سردیوں کی صبح کوٹری بیراج کے نیچے دھند کے ہلکے پردے میں لپٹی ہوئی ہے۔ دریائے سندھ کا پانی گہرا اور خاموش ہے، مگر اس خاموشی میں ایک کشتی کی ہلکی سی آواز ابھرتی ہے۔ یہ عبدالمجید ملاح کی کشتی ہے۔
ایک ایسا ماہی گیر جو اپنی پوری زندگی اسی دریا کے ساتھ گزارتا آیا ہے۔
عبدالمجید ملاح 50 سال کے سادہ مزاج شخص ہیں۔ لیکن دریا کے معاملے میں ان کا تجربہ کسی کتاب سے کہیں زیادہ ہے۔ جال سنبھالتے ہوئے وہ بتاتے ہیں کہ دریا کے ہر موسم کی اپنی زبان ہوتی ہے اور وہ زبان صرف وہی سمجھ سکتا ہے جو نسلوں سے ان پانیوں میں سانس لے رہا ہو۔
ساگا ڈیجیٹل سے گفتگو کرتے ہوئے عبدالمجید ملاح نے کہا: ‘کچھ مچھلیاں روایتی طور پر ‘گرم’ سمجھی جاتی ہیں اور لوگ انہیں جسمانی طاقت، خاص طور پر مردانہ توانائی کے لیے فائدہ مند مانتے ہیں۔
عبدالمجید کے مطابق الّاچی مچھلی، سینگاڑہ اور بام سب سے زیادہ گرم تاثیر والی اور طاقت بخش مچھلیاں سمجھی جاتی ہیں۔ ‘بغیر جھلکے والی مچھلی ہمیشہ سے مردانہ طاقت کے لیے خاص طور پر مفید مانی جاتی رہی ہے۔’
یہ تمام باتیں روایتی علم اور مقامی اعتقادات کا حصہ ہیں، جو ماہی گیروں کی نسلوں میں منتقل ہوتی رہی ہیں۔ عبدالمجید انہیں یقین کے ساتھ بیان کرتا ہے، لیکن ساتھ یہ بھی بتاتے ہیں کہ یہ باتیں اس کے بزرگوں کے تجربات اور مشاہدات کا حصہ تھیں۔
وہ مسکراتے ہوئے کہتا ہے کہ اگر کوئی شخص یہ گرم تاثیر والی مچھلیاں کھا لے تو شدید سردی میں بھی دریائے سندھ کے ٹھنڈے پانی میں چھلانگ لگا سکتا ہے۔ اسے یقین ہے کہ دریا بھی طاقت دیتا ہے اور مچھلی بھی۔
جال کھینچتے ہوئے اس کے ہاتھ میں ایک تازہ سینگاڑہ آتی ہے۔ وہ اسے دیکھ کر کہتا ہے کہ یہ دریا کی بہترین مچھلیوں میں شمار ہوتی ہے۔ ذائقے میں بھی اعلیٰ، اور روایتی اعتبار سے طاقت بخش بھی۔
دھوپ کی ہلکی سی کرنیں جیسے ہی دریا پر پڑتی ہیں، منظر بدلنے لگتا ہے۔ پانی کی سطح چمکنے لگتی ہے، اور عبدالمجید کشتی کو آہستہ آہستہ کنارے کی طرف لے جاتا ہے۔
اس کے چہرے پر اطمینان ہے، اس کا آج کا دن بھی دریا کے نام رہا۔
کنارے پر اترتے ہوئے وہ کہتا ہے کہ دریا انسان کی محنت کا بدلہ ضرور دیتا ہے۔
اس کے نزدیک سندھ کا دریا صرف پانی نہیں، روزگار، روایت، طاقت اور زندگی کا استعارہ ہے۔
عبدالمجید کی باتیں سائنس کی نہیں، بلکہ صدیوں سے چلے آنے والے لوک علم کا حصہ ہیں۔
کوٹری بیراج کے نیچے بہتا ہوا دریائے سندھ آج بھی ایسے لوگوں کی زندگیوں کا مرکز ہے، جو اس کے رحم و کرم، اس کی سخاوت اور اس کی کہانیوں کے ساتھ جڑے ہوئے ہیں۔
