Tag: ذوالفقار علی بھٹو

یہ قصہ 10 اور 11 نومبر 1974 کی رات ملتان سے شروع ہوتا ہے، جب وزیرِاعظم ذوالفقار علی بھٹو عوامی مصروفیات سے فارغ ہو کر ملتان میں گورنر پنجاب نواب صادق حسین قریشی کے محل نما بنگلے میں کیوبا کے سگار کے کش لے رہے تھے کہ اسی لمحے اُن کے ملٹری سیکریٹری لیفٹیننٹ جنرل امتیاز نے رازداری سے اُن کے کان میں بتایا کہ انسپکٹر جنرل (آئی جی) پولیس پنجاب راؤ رشید ٹیلی فون پر فوری بات کرنا چاہتے ہیں۔

ذوالفقار علی بھٹو کی اجازت کے بعد لائن پر موجود آئی جی پنجاب راؤ رشید نے بتایا کہ لاہور میں رکنِ قومی اسمبلی احمد رضا قصوری پر قاتلانہ حملہ ہوا ہے، جس میں اُن کے والد نواب محمد احمد خان قصوری جاں بحق ہو گئے ہیں، اور احمد رضا قصوری اس قتل کا مقدمہ خود وزیرِاعظم ذوالفقار علی بھٹو کے خلاف درج کروانا چاہتے ہیں۔

یہ سنتے ہی بھٹو نے سگار ایش ٹرے میں بجھاتے ہوئے کہا: ‘Oh! No, very sad’

اور پھر آئی جی پنجاب کو ہدایت دی کہ احمد رضا قصوری جو چاہتے ہیں، ویسا ہی کیا جائے۔

اس معاملے کی تفصیل کچھ یوں ہے کہ احمد رضا قصوری، جو پیپلز پارٹی کے ٹکٹ پر قصور سے قومی اسمبلی کے رکن منتخب ہوئے تھے، بعد ازاں قومی اسمبلی میں اپنی ہی جماعت کے سربراہ اور وزیرِاعظم ذوالفقار علی بھٹو کی پالیسیوں پر شدید تنقید کرنے لگے۔

اسی دوران ایک رات احمد رضا قصوری اپنے والد نواب محمد احمد خان قصوری، والدہ اور خالہ کے ہمراہ اپنی ٹویوٹا کرولا مارک ٹو گاڑی میں ماڈل ٹاؤن لاہور میں تحریکِ استقلال گجرات کے صدر بشیر حسین شاہ کے گھر ایک شادی کی تقریب میں شرکت کے بعد واپس لوٹ رہے تھے، جہاں انہوں نے قربان حسین قوال اور اُن کے ساتھیوں کی قوالیاں سنی تھیں۔

گاڑی احمد رضا قصوری چلا رہے تھے، اگلی نشست پر اُن کے والد بیٹھے تھے جبکہ پچھلی نشست پر اُن کی والدہ اور خالہ موجود تھیں۔ جب گاڑی شاہ جمال چوک لاہور کے قریب پہنچی تو اچانک تین مسلح افراد نے گاڑی پر اندھا دھند فائرنگ کر دی، جس کے نتیجے میں نواب محمد احمد خان قصوری شدید زخمی ہو گئے۔

احمد رضا قصوری اپنے والد کو گلبرگ لاہور کے یونائیٹڈ کرسچن اسپتال لے گئے، مگر وہ رات تین بجے زخموں کی تاب نہ لاتے ہوئے انتقال کر گئے۔

اس کے بعد احمد رضا قصوری اچھرہ تھانے پہنچے اور ایس ایچ او عبدالحئی نیازی سے کہا کہ اُن کے والد کے قتل کی ایف آئی آر وزیرِاعظم ذوالفقار علی بھٹو کے خلاف درج کی جائے۔

اتنے میں ڈی آئی جی لاہور سردار عبدالوکیل اور ایس ایس پی لاہور اصغر خان بھی تھانے پہنچ گئے۔ جب پولیس افسران کو معلوم ہوا کہ احمد رضا قصوری وزیرِاعظم کے خلاف ایف آئی آر درج کروانا چاہتے ہیں تو وہ سخت پریشان ہو گئے۔

انہوں نے فوراً آئی جی پنجاب راؤ رشید کو صورتحال سے آگاہ کیا، جنہوں نے وزیرِاعلیٰ پنجاب میاں محمد حنیف رامے کو اطلاع دی۔ حنیف رامے کی ہدایت پر راؤ رشید نے ملتان میں وزیرِاعظم کے ملٹری سیکریٹری لیفٹیننٹ جنرل امتیاز سے رابطہ کیا، جنہوں نے بھٹو کو تمام صورتحال سے آگاہ کیا۔

بھٹو نے فوراً حکم دیا کہ مدعی احمد رضا قصوری کی خواہش کے مطابق ایف آئی آر درج کی جائے۔

یوں 11 نومبر 1974 کو اچھرہ تھانہ لاہور میں ایف آئی آر نمبر 402 ذوالفقار علی بھٹو کے خلاف درج ہوئی۔ بھٹو کو اُس وقت شاید اندازہ بھی نہ تھا کہ جس مقدمے کے اندراج کا حکم وہ خود دے رہے ہیں، وہی مقدمہ بعد میں اُن کی پھانسی کا سبب بنے گا۔

حکومت نے اس قتل کی تحقیقات کے لیے پولیس ٹیم کے علاوہ لاہور ہائی کورٹ کے جسٹس شفیع الرحمن کی سربراہی میں ایک کمیشن بھی قائم کیا، مگر اکتوبر 1975 میں یہ کیس ‘بلائنڈ مرڈر’ قرار دے کر بند کر دیا گیا۔

پھر پانچ جولائی 1977 کو جنرل ضیاء الحق نے بھٹو حکومت کا تختہ الٹ کر مارشل لا نافذ کر دیا، اور یہ بند مقدمہ دوبارہ کھول دیا گیا۔

تحقیقات ایف آئی اے کے ڈپٹی ڈائریکٹر عبدالخالق کے سپرد کی گئیں۔ 25 جولائی 1977 کو ایف ایس ایف (فیڈرل سکیورٹی فورس) کے انسپکٹر ارشد اقبال اور سب انسپکٹر رانا افتخار کو گرفتار کیا گیا۔ اگلے روز دونوں افسران نے مجسٹریٹ کے سامنے بیان دیا کہ انہوں نے ایف ایس ایف کے ڈائریکٹر آپریشنز میاں غلام عباس کے حکم پر احمد رضا قصوری پر حملہ کیا تھا۔

بعد ازاں ایف ایس ایف کے ڈائریکٹر جنرل مسعود محمود، میاں عباس، انسپکٹر غلام حسین، انسپکٹر ارشد اقبال، اے ایس آئی رانا افتخار اور صوفی غلام مصطفیٰ کو بھی اس کیس میں گرفتار کیا گیا۔

ذوالفقار علی بھٹو کو تین ستمبر 1977 کو 70 کلفٹن کراچی سے گرفتار کیا گیا، تاہم 13 ستمبر کو لاہور ہائی کورٹ کے جسٹس کے ایم صمدانی نے انہیں ضمانت پر رہا کر دیا۔

لیکن 17 ستمبر 1977 کو عید کی رات بھٹو کو المرتضیٰ ہاؤس لاڑکانہ سے دوبارہ گرفتار کر لیا گیا اور بعد ازاں کوٹ لکھپت جیل لاہور منتقل کر دیا گیا۔

ضیاء حکومت نے آئینی اور قانونی تقاضوں کو نظر انداز کرتے ہوئے یہ مقدمہ سیشن کورٹ میں چلانے کے بجائے براہِ راست لاہور ہائی کورٹ کے چیف جسٹس مولوی مشتاق کے سپرد کر دیا، جنہوں نے بھٹو کی ضمانت مسترد کر دی۔

مولوی مشتاق کی سربراہی میں پانچ رکنی بینچ تشکیل دی گئی، جس میں جسٹس آفتاب حسین، جسٹس ذکی الدین، جسٹس گل باز خان اور جسٹس ایم ایچ قریشی شامل تھے۔

بھٹو نے اس پورے مقدمے کو اپنے خلاف سازش اور ڈرامہ قرار دیا، مگر مبینہ طور پر مولوی مشتاق پہلے ہی جنرل ضیاء کے دباؤ میں بھٹو کو سزا دینے کا فیصلہ کر چکے تھے۔

آخرکار 18 مارچ 1978 کو لاہور ہائی کورٹ نے ذوالفقار علی بھٹو، میاں عباس، ارشد اقبال، صوفی غلام مصطفیٰ اور رانا افتخار کو سزائے موت سنا دی، جبکہ وعدہ معاف گواہ بننے والے ایف ایس ایف کے ڈائریکٹر جنرل مسعود محمود اور انسپکٹر غلام حسین کو بری کر دیا گیا۔

بعد ازاں سپریم کورٹ میں اپیل دائر کی گئی۔ جنرل ضیاء نے اپیل کی سماعت سے قبل چیف جسٹس یعقوب علی خان کو ہٹا کر جسٹس انوار الحق کو چیف جسٹس مقرر کر دیا۔

نو رکنی بینچ تشکیل دی گئی، مگر دورانِ سماعت جسٹس قیصر خان ریٹائر ہو گئے اور جسٹس وحید الدین احمد بیماری کے باعث الگ ہو گئے۔

چھ فروری 1979 کو سپریم کورٹ نے چار کے مقابلے میں تین ججوں کی اکثریت سے بھٹو کی سزائے موت برقرار رکھی۔ چیف جسٹس انوار الحق، جسٹس نسیم حسن شاہ، جسٹس اکرم اور جسٹس کرم الٰہی چوہان نے سزا برقرار رکھی، جبکہ جسٹس صفدر شاہ، جسٹس محمد حلیم اور جسٹس دراب پٹیل نے اختلاف کرتے ہوئے بھٹو کو بے گناہ قرار دیا۔

آخرکار جنرل ضیاء الحق کی حکومت نے چار اپریل 1979 کو راولپنڈی ڈسٹرکٹ جیل میں ذوالفقار علی بھٹو کو پھانسی دے دی۔

قانونی ماہرین کے مطابق اگر جسٹس قیصر خان اور جسٹس وحید الدین احمد بینچ میں شامل رہتے تو شاید فیصلہ مختلف ہوتا۔ دنیا بھر کے قانون دانوں نے اس فیصلے کو متنازع اور جانبدار قرار دیا۔

بھٹو کو سیشن کورٹ میں دفاع کا بنیادی حق نہیں دیا گیا، جبکہ چیف جسٹس مولوی مشتاق پر ذاتی تعصب کے الزامات بھی لگتے رہے۔

مزید یہ کہ خود سپریم کورٹ کے سابق چیف جسٹس نسیم حسن شاہ بعد میں اعتراف کر چکے ہیں کہ بھٹو کی پھانسی جنرل ضیاء الحق کے دباؤ کا نتیجہ تھی اور یہ عدلیہ کا غلط فیصلہ تھا۔

آج بھٹو کے سیاسی مخالفین بھی اس مقدمے کو ‘عدالتی قتل’ قرار دیتے ہیں، مگر پاکستان کی عدالتوں اور بار کونسلوں کی قانونی کتب میں ذوالفقار علی بھٹو آج بھی دفعہ 302 کے تحت سزا یافتہ مجرم کے طور پر درج ہیں، اگرچہ اس مقدمے کو عدالتی نظیر کے طور پر استعمال نہیں کیا جاتا۔

لاڑکانہ کے بزرگوں سے آج بھی ذوالفقار علی بھٹو اور جمعو فقیر کی دوستی کے قصے نہیں بھولے۔ جمعو فقیر وہ واحد آدمی تھا جو نہ صرف ذوالفقار علی بھٹو کے ساتھ ہنسی مذاق کرتا تھا بلکہ وہ فقیرانہ باتوں میں بھٹو کو منہ پر کڑوی باتیں بھی کہہ دیتا تھا۔

جمعو فقیر ذات کا سومرو تھا اور قمبر تعلقہ کے گاؤں کور سلیمان کا رہنے والا تھا۔ کچھ عرصہ گاؤں ڈتل ابڑو میں بھی رہا۔ قمبر کے مرکزی سڑک پر پٹھان والی مسجد کے پاس نائی کا کام بھی کیا۔ ہمارا گھر قمبر شہر میں پٹھان مسجد کے قریب ہوتا تھا۔

میرے والد اکثر پٹھان مسجد کے پاس نائی یوسف منگی کی دکان پر بیٹھتے تھے۔ میں نے بچپن میں جمع فقیر کو پہلی دفعہ وہیں دیکھا تھا۔ اس کے ساتھ میں نے بچپن میں قرآن شریف کا درس بھی پٹھان مسجد کے پیش امام سے حاصل کیا۔

تو ذکر ہو رہا تھا جمعوفقیر کا۔ جمعو فقیر قمبر چھوڑ کر لاڑکانہ منتقل ہو گیا اور فقیرانہ رنگ میں چل پڑا۔ گداگری کر کے گزارہ کرتا تھا۔ اکثر لاڑکانہ کی سڑکوں اور راستوں پر اپنے گدھے پر نظر آتا تھا۔

جمعوفقیر کی زندگی کا یہ معمول بن گیا تھا کہ وہ روزانہ اپنے گدھے پر لاڑکانہ کی گوشت مارکیٹ جاتا، پوری مارکیٹ کے ذبح شدہ جانوروں کے گوشت کے ٹکڑے اکٹھے کرتا اور انہیں اپنے گدھے کی گودڑیوں میں بھرتا، پھر وہ ٹکڑے لاڑکانہ کے آوارہ کتوں کو کھلاتا تھا۔ لاڑکانہ کے آوارہ اور لاوارث کتے بھی اس کے ایسے عادی ہو گئے تھے کہ جدھر جمعو فقیر جاتا ادھر کتوں کا ہجوم اس کے پیچھے چلتا تھا۔ خون اور گوشت کے ٹکڑوں کی وجہ سے فقیر سے گوشت اور خون کی بو آتی رہتی تھی۔ شاذ و نادر ہی کوئی فقیر نہاتا ہوگا۔

ان دنوں ہم کچھ کمیونسٹ قسم کے دوست لاڑکانہ کی مچھلی گوشت مارکیٹ والے مئے خانے پر جا کر بیٹھتے تھے۔ تو ایک دن میں نے جا کر جمعوفقیر کو چائے کا کپ دیا۔ اس نے کہا: ‘بیٹے کس خوشی میں چائے دے رہے ہو؟’

میں نے کہا: ‘فقیر، امام کی سبیل ہے’

تو جمعوفقیر نے چائے کا کپ لیتے ہوئے کہا: ‘ابا اماموں سے پھر کیا حساب کتاب؟’

وہ اپنی دھن میں مگن تھا۔ اس فقیر کی باتیں فقیرانہ رنگ میں رنگی ہوئی ہوتی تھیں۔

ذوالفقار علی بھٹو کے ساتھ اس کا دوستی کا تعلق بھی اتفاقی اور حادثاتی طور پر بنا۔ جمعو فقیر خود بھٹو صاحب کے پاس نہیں گیا تھا بلکہ بھٹو صاحب ابھی وزیر اعظم نہیں بنے تھے کہ کسی نے انہیں بتایا کہ شہر میں گدھے پر گھومنے والا ایک فقیر ہے جس کی باتیں نہ صرف سننے کے قابل ہیں بلکہ سبق آموز بھی ہیں۔

تو بھٹو صاحب نے کہا اسے المرتضیٰ ہاؤس لے آؤ۔ جب لوگوں نے جا کر جمعوفقیر سے کہا کہ تمہیں بھٹو صاحب نے بلایا ہے تو فقیر ناراض ہو گیا اور جواب دیا: ‘میں کیا بھٹو کا نوکر ہوں؟’ اور کہہ دیا کہ میں نہیں آؤں گا۔

لوگوں نے جا کر بھٹو صاحب کو بتایا کہ جمعوفقیر نے آنے سے انکار کر دیا ہے۔ یہ سن کر بھٹو صاحب خود گاڑی میں بیٹھ کر جمعوفقیر سے ملنے نکلے۔ اس وقت جمعو فقیر لاڑکانہ کی کینیڈی مارکیٹ کے پاس پیپل کے درخت کے نیچے اپنے گدھے کو گھاس کھلا رہا تھا۔

بھٹو صاحب کو دیکھ کر جمعوفقیر نے کہا: ‘بھٹو صاحب کیسے بھٹک کر آ گئے ہو؟’

بھٹو صاحب نے جواب دیا: ‘فقیر حاضری بھرنے آیا ہوں’

فقیر نے کہا: ‘ابا میں کون سا ماسٹر ہوں جو حاضری بھرنے آئے ہو؟’

بھٹو صاحب نے کہا: ‘چلو دوستی کرتے ہیں’

فقیر نے کہا: ‘دوستی کرنا آسان ہے، نبھانا مشکل ہے’

بھٹو نے کہا: ‘کر کے دیکھ لو، پھر تم مالک ہو’

تو درخت کے نیچے گدھے سمیت بیٹھے جمعوفقیر نے کہا: ‘بھٹو صاحب تم میرے ڈیرے پر آ گئے ہو، تمہیں واپس نہیں کرتا’

اس طرح لاڑکانہ کی سڑکوں پر گداگری کرنے والے جمعوفقیر اور بھٹو صاحب کے درمیان دوستی قائم ہو گئی۔

جمعوفقیر کی باتوں میں ہنسی مذاق کے ساتھ سبق آموز باتیں بھی ہوتی تھیں۔ ایک دفعہ اس نے ایک بلوچ سے خیرات مانگی، اس نے پانچ روپے دیے۔ تو فقیر نے آسمان کی طرف دیکھ کر کہا: ‘اللہ سائیں، بلوچ بھی تم سے ڈرتے ہیں’

ایک دفعہ ڈگری کالج کے طلبہ نے اس سے کہا: ‘جمعہ اپنی بیوی کا نام بتاؤ’

فقیر نے کہا: ‘ابا وضو نہیں ہے’

طلبہ نے کہا: ‘بیوی کے نام کا وضو سے کیا تعلق؟’

فقیر نے جواب دیا: ‘ابا بیویاں پاک ہوتی ہیں، پاک لوگوں کے نام بغیر وضو نہیں لیتے’

جب بھٹو صاحب وزیر اعظم بن گئے تو ایک بار جمعوفقیر سے ملے اور کہا: ‘دعا کرو’

فقیر نے کہا: ‘لگتا ہے تم وزیر اعظم بن کر خوش نہیں ہو، آؤ ایک کام کرتے ہیں، تم میرا گدھا سنبھالو اور جمعو بن جاؤ، میں بھٹو بن جاتا ہوں’

بھٹو صاحب نے کہا: ‘منظور ہے، مجھے اپنا گدھا دو’

فقیر نے کہا: ‘نہیں ابا، میں اپنا گدھا نہیں دوں گا، تمہارے پاس پہلے ہی بہت گدھے ہیں، پہلے انہیں سنبھالو’

یہ سن کر بھٹو صاحب ہنس پڑے اور وزیروں کے چہرے اتر گئے۔

بھٹو صاحب وزیر اعظم بننے کے بعد جب بھی لاڑکانہ آتے، کوشش کرتے کہ جمعوفقیر سے کچھ وقت ضرور بیٹھیں۔

جمعوفقیر کا کوئی مستقل ٹھکانہ نہیں تھا۔ کبھی لاہوری محلہ، کبھی کہیں اور۔ آخری دنوں میں اس کا ٹھکانہ قبرستان کی ایک جھونپڑی تھی۔

ایک بار بھٹو صاحب نے کہا: ‘میں تمہیں گھر بنا دیتا ہوں’

فقیر ناراض ہو گیا اور کہا: ‘دوبارہ کہا تو دوستی ختم’

ایک بار بھٹو صاحب موئن جو دڑو ایئرپورٹ پر اترے اور کہا کہ جمع فقیر سے ملنا ہے۔ آخرکار وہ باقرانی روڈ پر مل گیا۔ بھٹو نے اسے رات کے کھانے کی دعوت دی۔

فقیر نے شرط رکھی:

‘ہم دونوں کے علاوہ کوئی نہیں ہوگا’

پھر کہا: ‘میرا گدھا بھی ساتھ آئے گا’

بھٹو صاحب نے دونوں شرطیں مان لیں۔

آخرکار جمعوفقیر اپنے گدھے سمیت المرتضیٰ ہاؤس پہنچا۔ اس نے خود بھی کھانا کھایا اور اپنے گدھے کو بھی خوب چارہ کھلایا۔

لاڑکانہ کے اس اللہ والے فقیر کا انتقال 1990 میں ہوا

جیل سپرنٹنڈنٹ نے ملاقات کا وقت ختم ہونے کا اعلان کیا تو بے نظیر بھٹو نے جیل کی سلاخوں کو پکڑ لیا، برائے مہربانی دروازہ کھول دیں، میں اپنے پاپا کو الوداع کہنا چاہتی ہوں۔

بی بی مسلسل التجا کرتی رہیں مگر سپرنٹنڈنٹ نے انکار کردیا۔

یہ پھانسی کے تختے پر لٹکنے سے پہلے ذوالفقار علی بھٹو کی اپنی اہلیہ اور بیٹی سے آخری ملاقات تھی۔۔

اپنی پیاری بیٹی اور اہلیہ سے جدائی کے وقت بھٹو صاحب نے کہا: ‘آج شب علائم دنیا سے آزاد ہوجاؤں گا، میں اپنی والدہ اور اپنے والد کے پاس چلا جاؤں گا، میں لاڑکانہ میں اپنے اجداد کی زمینوں کی طرف جارہا ہوں تاکہ اس سرزمین کا، اس کی خوشبو اور اس کی فضا کا حصہ بن جاؤں۔’

بھٹو صاحب نے اپنے جملے مکمل کرتے ہوئے آخر میں مسکراتے ہوئے کہا ۔’ آج کل لاڑکانہ میں بہت گرمی ہے۔’

‘میں وہاں ایک سائبان تعمیر کردوں گی’ بے نظیر بھٹو بمشکل یہ جملہ مکمل کر پاتی ہیں اور جیل حکام نے آگے بڑھ کر انہیں الگ کردیا،

بی بی نے آخری جملہ ادا کیا، ‘الوداع پاپا’

بے نظیر بھٹو نے اپنی خود نوشت Daughter of East میں لکھا: ‘راولپنڈی سینٹرل جیل میں 4 اپریل 1979 کو صبح صادق سے بھی بہت پہلے انہوں نے میرے والد کو قتل کردیا۔ چند کلومیٹر دور سہالہ کے ویران پولیس ٹریننگ کیمپ میں اپنی والدہ کے ساتھ مقید، میں نے اپنے والد کی موت کے اس لمحے کو محسوس کیا، وہ رات ہم دونوں پر بہت بھاری اور کرب آمیز گزری، ہم ایک دوسرے سے سمٹی رہیں۔’

‘ہم وزیر اعظم کی تدفین کے ساتھ جانے کے لیے تیار ہیں،’ بی بی یہ اپنی بات مکمل نہ کر پائی تھی کہ چھوٹے جیلر نے بتایا ‘وہ انہیں دفنانے کے لیے پہلے ہی لے جاچکے ہیں’

یہ سن کر بی بی کا لہجہ سخت ہوگیا، ‘ان کے گھر والوں کے بغیر میت لے گئے؟،

فوجی حکومت کے جرائم پیشہ افراد بھی جانتے ہیں میت کے ساتھ جانا، تدفین میں شامل ہونا، چہرہ دیکھنا ہمارا مذہبی فریضہ ہے’۔ بے نظیر بھٹو نے جذباتی لہجے میں جیلر پر غصہ کیا۔

جیلر نے یہ بھی نہیں بتایا کہ سابق وزیر اعظم کی میت کو پھانسی کے بعد کہاں لے گئے ہیں؟ بس جیل کی سیل کوٹھری میں ذوالفقار علی بھٹو کا بچا کچھا سامان بی بی کے حوالے کردیا۔

لمبی قمیض اور ڈھیلا پاجامہ جو انہوں نے آخری دنوں میں پہنا تھا، کیونکہ بطور سیاسی قیدی انہوں نے مجرم کی وردی پہننے سے انکار کردیا تھا۔کھانے کا ٹفن، گوکہ کچھ دنوں سے انہوں نے کھانے پینے سے انکار کردیا تھا، بستر کے کپڑے جن کی اجازت اس وقت ملی تھی جب چارپائی کے ٹوٹے ہوئے تاروں سے ان کی کمر چھلنی ہوچکی تھی، ان کا پینے کا پیالہ۔

ان کی انگوٹھی کہاں ہے؟ بی بی کے پوچھنے پر جیلر نے جیب ٹٹولی اور انگوٹھی نکال کر دی۔

بی بی لکھتی ہیں ہم ماں اور بیٹی کو پھانسی سے ایک روز قبل ملاقات کے لیے جایا گیا تو میرے والد نے جیل کی سیل کوٹھری سے آواز دی، ‘آج تم دونوں اکٹھے کیوں آئی ہو؟ کیا یہ آخری ملاقات ہے’ نصرت بھٹو خاموش رہیں مگر بی بی نے جواب دیا۔’ میرا خیال ہے ایسا ہی ہے۔’

ذوالفقار علی بھٹو نے قریب ہی کھڑے جیلر سے پوچھا، ‘کیا یہ آخری ملاقات ہے؟’

جیلر نے اثبات میں سر ہلایا، ‘کیا تاریخ کا تعین ہوگیا’ ذوالفقار علی بھٹو نے فوری سوال کیا۔ جیلر نے بتایا کہ کل کا دن طے ہوا ہے، قواعد کے مطابق صبح پانچ بجے۔ بیوی اور بیٹی سے آخری ملاقات طے شدہ وقت ایک گھنٹہ کے بجائے 30 منٹ کروائی گئی۔

‘غسل اور شیو کرنے کے لیے انتظامات کرو، دنیا خوبصورت ہے اسے میں اسی حالت میں الوداع کہنا چاہتا ہوں’ ذوالفقار علی بھٹو نے جیلر کو مخاطب کرتے ہوئے کہا۔

انہوں نے اپنی کتابیں بی بی کے حوالے کرتے ہوئے کہا انہیں لے جاؤ، میں چاہتا ہوں میری کسی چیز کو یہ لوگ ہاتھ نہ لگائیں۔

وہ چند سگار جو وکلا چھوڑ گئے تھے بی بی کے حوالے کرتے ہوئے کہا صرف آج رات کے لیے ایک رکھ لیتا ہوں، شالیمار کولون کی شیشی بھی رکھ لی، اپنی انگوٹھی اتار کر دینے لگے تو نصرت بھٹو نے اصرار کیا ‘اسے پہنے رکھیں’۔ جس پر ذوالفقار علی بھٹو نے کہا ٹھیک ہے پہن لیتا ہوں مگر بعد میں اسے بے نظیر کے حوالے کر دینا۔

‘دوسرے بچوں کو میرا پیار دینا،’ نصرت بھٹو کو مخاطب کرتے ہوئے کہا۔

انہوں نے کہا میں تمہاری مرضی پر چھوڑتا ہوں اگر چاہو تو پاکستان سے اس وقت تک باہر چلی جاؤ جب تک آئین معطل ہے اور مارشل لاء نافذ ہے۔

‘ہم باہر نہیں جا سکتے، ہم جرنیلوں کو یہ تاثر نہیں دیں گے کہ وہ جیت چکے ہیں۔’ نصرت بھٹو نے جواب دیا۔ ‘اور تم پنکی؟’ بھٹو صاحب نے بی بی کو مخاطب کیا تو انہوں نے بھی کہا ‘میں بھی کبھی نہیں جا سکتی۔’

30 نومبر 1967 کو ذوالفقار علی بھٹو نے لاہور میں ڈاکٹر مبشر حسن کے گھر پاکستان پیپلز پارٹی کے قیام کا اعلان کیا۔ پیپلز پارٹی کے قیام کو تقریبا 58 برس مکمل ہو چکے ہیں، مگر یہ پیپلز پارٹی اب ماضی والی پارٹی باقی نہیں رہی جس میں عوام اور کارکنوں کی آواز سنی جاتی تھی۔

اگست 1988 میں جنرل ضیا الحق کی حادثاتی موت کے بعد، جب پاکستان کی ملٹری سول اسٹیبلشمنٹ نے عام انتخابات کا اعلان کیا، تو یہ انتخابات ذوالفقار علی بھٹو کی شہادت کے بعد پہلے عام انتخابات تھے۔

ان انتخابات میں پاکستان پیپلز پارٹی محترمہ بینظیر بھٹو کی قیادت میں میدان میں اتری۔ پارٹی ٹکٹوں کے فیصلے خود محترمہ بینظیر بھٹو کر رہی تھیں۔ان دنوں چانڈیا قبیلے کے سردار، نواب احمد سلطان چانڈیو، نگران وزیراعلیٰ قاضی اختر کی کابینہ میں نگران صوبائی وزیر خوراک تھے اور قومی اسمبلی کے حلقہ قمبر۔وارہ سے انتخاب بھی لڑ رہے تھے۔ ان کے صاحبزادے سردار شبیر احمد چانڈیو، پیپلز پارٹی ضلع لاڑکانہ کی ورکنگ کمیٹی کے رکن تھے۔ سردار شبیر احمد چانڈیو نے قمبر کے قومی اور صوبائی اسمبلی کے حلقوں کے لیے پارٹی ٹکٹ کی درخواست دی تھی۔

محترمہ بینظیر بھٹو کی کوشش تھی کہ نواب احمد سلطان چانڈیو نگران وزارت سے استعفیٰ دے کر پیپلز پارٹی میں شامل ہو جائیں، تاکہ قومی اسمبلی کی نشست نواب احمد سلطان چانڈیو اور صوبائی اسمبلی کی نشست ان کے صاحبزادے سردار شبیر احمد چانڈیو کو دی جا سکے۔ مگر نواب احمد سلطان چانڈیو نے نگران کابینہ سے استعفیٰ دے کر پیپلز پارٹی میں شامل ہونے کے بجائے، اسی حلقے سے پیپلز پارٹی کے امیدواروں کے مقابلے میں الیکشن لڑنے کا اعلان کر دیا۔
اس صورتحال میں یہ سوال پیدا ہوا کہ قومی اسمبلی کے حلقہ این اے 165 (قمبر۔وارہ) سے پیپلز پارٹی کا امیدوار کون ہوگا؟ اس وقت قمبر شہدادکوٹ ضلع نہیں بنا تھا اور پورا علاقہ ضلع لاڑکانہ میں شامل تھا۔ ضلع لاڑکانہ میں قومی اسمبلی کی تین نشستیں تھیں:
این اے 164 لاڑکانہ-ون (لاڑکانہ، باقرانی، ڈوکری، باڈہ)
این اے 165 لاڑکانہ- ٹو (قمبر اور وارہ تعلقہ)
این اے 166 لاڑکانہ- تھری (شہدادکوٹ، قبو سعید خان، سجاول، میروخان، رتوڈیرو، نئون دیرو)
این اے 164 سے بیگم نصرت بھٹو نے کاغذات نامزدگی جمع کروائے، جبکہ ان کے مقابلے میں ڈاکٹر حمیدہ کھوڑو تھیں۔
این اے 166 سے محترمہ بینظیر بھٹو امیدوار تھیں اور ان کے مقابلے میں مولانا علی محمد حقانی (شہید ڈاکٹر خالد محمود سومرو کے والد) میدان میں تھے۔
این اے 165 کے لیے نواب احمد سلطان چانڈیو کے مقابلے میں پیپلز پارٹی کی جانب سے بیگم اشرف عباسی کو امیدوار نامزد کیا گیا۔ بیگم اشرف عباسی نے کہا کہ یہ حلقہ نوابوں کے مقابلے کی وجہ سے مشکل ضرور ہے، مگر وہ مقابلہ کریں گی، بشرطیکہ ان کے بیٹے حاجی منور علی عباسی کو بھی پارٹی ٹکٹ دیا جائے۔ محترمہ بینظیر بھٹو نے یہ شرط قبول کر لی۔

یوں این اے 165 سے پیپلز پارٹی کی امیدوار بیگم اشرف عباسی، صوبائی نشست قمبر سے غلام مجتبیٰ اسران، اور وارہ سے نثار احمد کھوڑو کو ٹکٹ دیا گیا۔
یہ الیکشن پاکستان بھر میں مشہور ہوا، جہاں ایک طرف روایتی قبائلی نواب احمد سلطان چانڈیو تھے اور دوسری طرف ایک تعلیم یافتہ خاتون ڈاکٹر بیگم اشرف عباسی۔ ہم کارکنوں کو اس انتخابی مہم کے دوران دباؤ، دھمکیوں اور جھگڑوں کا سامنا بھی کرنا پڑا۔
نتائج کے مطابق:
بیگم اشرف عباسی: 63,011 ووٹ
نواب احمد سلطان چانڈیو: 15,941 ووٹ

نواب احمد سلطان چانڈیو کی شکست کے بعد سردار شبیر احمد چانڈیو نے دستبرداری کا اعلان کیا، مگر پولنگ شیڈول کے مطابق جاری رہی۔

صوبائی نشست کے نتائج:
غلام مجتبیٰ اسران: 36,128 ووٹ
مولوی محمد صدیق (جے یو آئی): 1,128 ووٹ
سردار شبیر احمد چانڈیو: صرف 341 ووٹ

دیگر حلقوں کے نتائج:
این اے 164:
بیگم نصرت بھٹو 83,449 ووٹ لے کر کامیاب
ڈاکٹر حمیدہ کھوڑو 4,524 ووٹ لے کر ناکام
این اے 166:
محترمہ بینظیر بھٹو 82,229 ووٹ لے کر کامیاب
مولانا علی محمد حقانی 1,979 ووٹ
اٹھارہ ماہ بعد، اگست 1990 میں صدر غلام اسحاق خان نے محترمہ بینظیر بھٹو کی حکومت برطرف کر دی اور دوبارہ انتخابات کا اعلان ہوا۔ اس موقع پر سردار شبیر احمد چانڈیو نے دوبارہ پارٹی ٹکٹ کے لیے درخواست دی۔ ہم کارکنوں نے محترمہ بینظیر بھٹو کے سامنے واضح کیا کہ 1988 میں ہمیں شدید مشکلات کا سامنا کرنا پڑا تھا، اس لیے دل آمادہ نہیں، مگر فیصلہ آپ کا ہے۔

محترمہ بینظیر بھٹو نے کارکنوں کی رائے کو اہمیت دیتے ہوئے سردار شبیر احمد چانڈیو کو ہدایت کی کہ پہلے ناراض کارکنوں کو منائیں۔ بعد ازاں قمبر میں ایک غریب کارکن کی جھونپڑی میں ملاقات ہوئی، جہاں سردار شبیر احمد چانڈیو نے ماضی کی تلخیوں پر معذرت کی اور کارکنوں کو منایا۔
کارکنوں کی رضامندی کے بعد 1990 کے انتخابات میں انہیں پارٹی ٹکٹ دیا گیا، جس میں انہوں نے ممتاز علی بھٹو کے مقابلے میں کامیابی حاصل کی:
سردار شبیر احمد چانڈیو: 59,464 ووٹ
ممتاز علی بھٹو: 16,198 ووٹ

1993 میں ایک بار پھر انتخابات ہوئے، اس بار باپ اور بیٹے آمنے سامنے تھے۔ نتیجہ یہ رہا:
سردار شبیر احمد چانڈیو: 48,669 ووٹ
نواب احمد سلطان چانڈیو: 24,727 ووٹ

یہ واضح کرتا ہے کہ محترمہ بینظیر بھٹو نہ صرف پارٹی کارکنوں کو عزت دیتی تھیں بلکہ جاگیرداروں اور بااثر طبقات کے سامنے ان کی اہمیت بھی منواتی تھیں۔
آج کا کارکن بس یہی دعا کرتا ہے کہ حلقے کا بااثر فرد اس سے راضی ہو جائے، ورنہ اس کی حالت بالکل اس کہاوت جیسی ہے: ‘نہ میکے کی رہی، نہ سسرال کی۔

پاکستان میں سرکاری طور پر کھلی کچہری سے مراد وہ عوامی اجلاس ہوتا ہے جہاں حکومتی افسران براہ راست عام شہریوں کے مسائل سنتے ہیں اور موقع پر ہی ان کے حل کے احکامات جاری کرتے ہیں۔

کھلی کچہری کا بنیادی مقصد عوام اور انتظامیہ کے درمیان فاصلے کم کرنا، شکایات کے فوری ازالے کو یقینی بنانا اور شفاف حکمرانی کو فروغ دینا ہوتا ہے۔

تاریخی طور پر برصغیر میں کھلی کچہری کا تصور مغل دور سے ملتا ہے، جب بادشاہ یا حاکم عوام کے درمیان بیٹھ کر ان کے مسائل سنتا تھا۔ پاکستان میں بطور سرکاری نظام کھلی کچہریوں کا باقاعدہ آغاز مختلف ادوار میں ہوا، تاہم دو ہزار کی دہائی کے بعد ضلعی انتظامیہ کے نظام کے تحت انہیں زیادہ منظم شکل دی گئی۔

خصوصاً 2010 کے بعد صوبائی حکومتوں نے کھلی کچہریوں کو عوامی رابطے کا اہم ذریعہ بنایا۔ خیبر پختونخوا، پنجاب، سندھ اور بلوچستان میں مختلف اوقات میں ضلعی اور تحصیل سطح پر کھلی کچہریوں کے انعقاد کو سرکاری پالیسی کا حصہ بنایا گیا۔

بعض ادوار میں وزرائے اعلیٰ اور وزرا بھی کھلی کچہریوں میں براہ راست شرکت کرتے رہے ہیں۔

کھلی کچہریوں کو عوامی سطح پر اس لیے اہم سمجھا جاتا ہے کہ یہاں شہریوں کو براہ راست بات کرنے کا موقع ملتا ہے، تاہم ناقدین کے مطابق ان کی کامیابی کا انحصار عمل درآمد پر ہوتا ہے، کیونکہ بعض اوقات مسائل سنے تو جاتے ہیں مگر حل نہیں ہو پاتے۔ اس کے باوجود کھلی کچہری کو پاکستان میں عوامی شکایات سننے کا ایک روایتی اور اہم سرکاری طریقہ سمجھا جاتا ہے۔

کھلی کچہری میں ڈپٹی کمشنر، اسسٹنٹ کمشنر، پولیس افسران، بلدیاتی نمائندے اور مختلف سرکاری محکموں کے افسران شریک ہوتے ہیں۔ شہری بغیر کسی رسمی درخواست کے اپنے مسائل پیش کرسکتے ہیں، جن میں زمین کے تنازعات، پولیس شکایات، بجلی، پانی، صحت، تعلیم اور سرکاری دفاتر سے متعلق امور شامل ہوتے ہیں۔

پاکستان میں وزیراعظم کی طرف سے عوام کے ساتھ کھلی کچہریوں کی روایت سابق وزیرِاعظم ذوالفقار علی بھٹو نے شروع کی تھی۔ وہ اپنی کھلی کچہریوں میں وزیرِاعلیٰ سمیت تمام وزرا اور بیوروکریسی کے ساتھ آ کر بیٹھتے تھے، اور ہر ہاری، مزدور اور طالب علم کو کھل کر بات کرنے کی مکمل آزادی ہوتی تھی۔ نہ صرف بات کرنے کی اجازت ہوتی تھی بلکہ ذوالفقار علی بھٹو وہاں موجود وزیرِاعلیٰ ممتاز علی بھٹو اور غلام مصطفیٰ جتوئی جیسے بڑے وڈیروں اور جاگیرداروں سے کہتے تھے کہ اسٹیج پر آ کر ان فریاد کرنے والوں کو جواب دیں۔

کسی ننگے پاؤں غریب ہاری، مزدور یا طالب علم کی فریاد یا سخت سوال پر وزیرِاعلیٰ یا کوئی وزیر اسے ڈانٹ نہیں سکتا تھا۔ عام لوگ وزیروں کو پسینہ لا دیتے تھے۔ ذوالفقار علی بھٹو کی کھلی کچہریاں محض دکھاوا نہیں ہوتیں تھیں؛ وہیں موقع پر احکامات جاری ہوتے تھے اور ان پر عمل بھی ہوتا تھا۔ ذوالفقار علی بھٹو خود ان معاملات کی فالو اپ بھی لیتے تھے۔
میرے اس کالم کو پڑھنے والے وہ بزرگ جنہوں نے ذوالفقار علی بھٹو کی کھلی کچہریاں دیکھی ہیں، اور وہ ہزاروں نوجوان جنہوں نے ذوالفقار علی بھٹو سے نوکری کی درخواست کی، اس بات کی تصدیق ضرور کریں گے۔ ذوالفقار علی بھٹو نوجوانوں سے تعلیم کے بارے میں پوچھتے اور کہتے تھے:

‘بیٹا کسٹمز، ایف آئی اے، پورٹ قاسم، بینکوں اور دیگر وفاقی اداروں میں جاؤ۔’
کیونکہ ذوالفقار علی بھٹو نے پاکستان سٹیل مل، پورٹ قاسم، پاکستان نیشنل شپنگ کارپوریشن، ایف آئی اے، نارکوٹکس کنٹرول فورس سمیت کئی نئے وفاقی ادارے قائم کیے۔ ان کی کوشش تھی کہ زیادہ سے زیادہ سندھ کے نوجوان ان اداروں میں بھرتی ہوں۔
میری یہ باتیں آج کے نوجوانوں کو شاید مذاق لگیں، لیکن جن لوگوں نے ذوالفقار علی بھٹو کے دور کی کھلی کچہریاں دیکھی ہیں وہ اس کی تصدیق کریں گے۔
المرتضیٰ ہاؤس لاڑکانہ میں ایک نوجوان نے ذوالفقار علی بھٹو سے نوکری کی درخواست کی۔ بھٹو صاحب نے اس سے پوچھا: ‘کتنی تعلیم ہے؟’
نوجوان نے کہا: ‘سر، انٹر پاس ہوں۔’
بھٹو صاحب نے پوچھا: ‘درخواست لائے ہو؟’
کہا: ‘نہیں سر۔’
ذوالفقار علی بھٹو سے اختلافات ہو سکتے ہیں، مگر وہ اپنے وقت کا ایک منفرد کردار بھی تھے۔ جب نوجوان نے کہا کہ درخواست نہیں لایا، تو وزیرِاعظم ذوالفقار علی بھٹو نے کہا: ‘ہاتھ دو۔’
بھٹو صاحب نے نوجوان کے ہاتھ کی ہتھیلی پر قلم سے نیشنل بینک آف پاکستان کے سربراہ کے نام لکھا:
‘Do the needful’
اور دستخط کر دیے۔ کہا: ‘خیال رکھنا، یہ لکھائی ہاتھ سے مٹنی نہیں چاہیے۔ یہ ہاتھ کراچی لے جا کر نیشنل بینک کے سربراہ کو دکھانا۔’
وہ نوجوان اسی رات ٹرین میں بیٹھ کر کراچی پہنچا، نیشنل بینک کے سربراہ سے ملا۔ بینک کے سربراہ نے بھٹو صاحب کے دستخط پہچان لیے اور واقعی وہ نوجوان میرے بڑے بھائی شبیر حسین قادری کے ساتھ 1974 میں نیشنل بینک آف پاکستان میں بطور کلرک بھرتی ہو گیا۔
یہ روایت محترمہ بینظیر بھٹو نے بھی برقرار رکھی۔

حال ہی میں پیپلز پارٹی کی قیادت نے سندھ کے صوبائی وزرا کو ہدایت دی کہ مختلف اضلاع میں کھلی کچہریاں منعقد کریں اور عوام کے مسائل سن کر حل کریں۔ مگر اس ڈرامے کے تحت سندھ کے مختلف اضلاع میں کھلی کچہریاں نہیں بلکہ عوام کی کھلی بے عزتیاں کی گئیں۔ پہلے تو صرف مخصوص افراد کو بولنے کی اجازت تھی جو پیپلز پارٹی کے رہنماؤں کی تعریف کریں، اور اگر کسی نے حق، سچ یا تنقید کی کوشش کی تو غنڈوں کے ذریعے لوگوں کو زدوکوب اور بے عزت کیا گیا۔

مجھے آج بھی ذوالفقار علی بھٹو کی قمبر شہر میں منعقدہ کھلی کچہری یاد ہے۔ 1974 میں میں گورنمنٹ بوائز ہائی اسکول قمبر میں چھٹی جماعت کا طالب علم تھا۔ ہمارے ڈرائنگ ماسٹر مرحوم مقبول احمد قادری محنتی مگر سخت استاد تھے۔ انہوں نے اپنے پیریڈ میں تمام طلبہ کے لیے جیومیٹری باکس لازمی قرار دیا۔ میں اور کچھ دوسرے طلبہ یہ نہ لا سکے۔
ایک دن غصے میں آ کر استاد نے ہمیں پورا پیریڈ بینچوں پر کھڑا رکھا اور وارننگ دی کہ آئندہ جس کے پاس جیومیٹری باکس نہ ہوا اسے کلاس میں مرغہ بنایا جائے گا۔
اتفاق سے اگلے دن وزیرِاعظم ذوالفقار علی بھٹو جناح باغ قمبر میں کھلی کچہری کے لیے آ رہے تھے۔ ہمیں اسکول کی طرف سے پاکستانی جھنڈے دے کر ان کے راستے میں کھڑا کیا گیا۔ بھٹو صاحب آئے، ہم نے تالیاں بجائیں۔

کچہری میں اعلان ہوا کہ جسے بھی کوئی مسئلہ ہو، قطار میں آ کر وزیرِاعظم کے سامنے پیش کرے۔ مجھے استاد کی سزا یاد آئی اور میں بھی قطار میں جا کھڑا ہوا۔
جب میری باری آئی تو اُس وقت کے ایس پی لاڑکانہ محمد پنجل جونیجو نے مجھے قطار سے ہٹا دیا۔ میں نے مزاحمت کی۔ یہ منظر بھٹو صاحب نے دیکھ لیا اور اشارے سے کہا: ‘بچے کو چھوڑ دو۔’
میں اسٹیج پر گیا، بھٹو صاحب نے نام پوچھا۔ میں نے کہا:
‘ذوالفقار علی۔
انہوں نے پیار سے گلے لگایا اور کہا: ‘میرا ہم نام بھائی ہے۔ کیا چاہیے؟’
میں نے کہا: ‘سر، جیومیٹری باکس اور آپ کا آٹوگراف۔’
بھٹو صاحب نے فوراً ڈپٹی کمشنر لاڑکانہ خالد احمد خان کھرل کو حکم دیا کہ بچے کو اس کی جماعت کی تمام کتابیں، کاپیاں اور جیومیٹری باکس فراہم کیے جائیں۔ پھر وزیر صحت عبدالوحید کٹپر سے کہا کہ اس بچے کو میری ذاتی ذوالفقار علی بھٹو چیریٹیبل ٹرسٹ سے ماہانہ اسکالرشپ دی جائے۔
یہ اسکالرشپ نومبر 1974 سے نومبر 1976 تک مجھے ملتی رہی۔
دسمبر 1976 میں، لاڑکانہ کے رائل سنیما میں فلم لگی ہوئی تھی۔ ہم دوست لاڑکانہ آئے اور المرتضیٰ ہاؤس پہنچ گئے۔ وہاں بھٹو صاحب موجود تھے۔ انہوں نے مجھے فوراً پہچان لیا اور کہا: ‘تم وہی قمبر والے لڑکے ہو نہ؟’
ان کی ایسی غیر معمولی یادداشت نے مجھے حیران کر دیا۔
انہوں نے پوچھا: ‘پڑھتے ہو یا آوارہ پھرتے ہو؟’
میں نے بتایا کہ اچھے نمبروں سے پاس ہوا ہوں۔
پوچھا: ‘اسکالرشپ مل رہی ہے؟’
میں نے کہا: ‘دو سال تک ملی، اب بند ہو گئی ہے۔’
فوراً حکم دیا کہ اسکالرشپ بحال کی جائے۔ یہ جولائی 1977 تک ملتی رہی، پھر مارشل لا کے بعد ٹرسٹ کے اکاؤنٹس سیل ہو گئے۔

میں نے ذوالفقار علی بھٹو جیسی یادداشت والا انسان نہیں دیکھا۔ اتنے بڑے عالمی رہنما ہونے کے باوجود، ہزاروں لوگوں سے ملنے کے بعد بھی انہوں نے مجھے پہچان لیا۔ یہ صلاحیت قدرت کی عطا ہے جو ہر کسی کو نہیں ملتی۔