حیدرآباد کی تحصیل قاسم آباد میں پوسٹ آفس کے قریب واقع گورنمنٹ گرلز ہائی اسکول میں ان دنوں تزئین و آرائش اور بنیادی سہولیات کی فراہمی کا کام جاری ہے۔
اسکول کی عمارت کے بیرونی حصوں، کلاس رومز اور دالانوں میں مزدور رنگ و روغن کر رہے ہیں، جبکہ اسکول کی ضروری مرمت کا کام بھی کیا جا رہا ہے۔
محکمہ تعلیم سندھ کی جانب سے صوبے کے تمام سرکاری اسکولوں کو بنیادی ضروریات پوری کرنے کے لیے حال ہی میں اسکول اسپیسفک بجٹ جاری کیا گیا ہے۔ اسی بجٹ کے تحت قاسم آباد کے اس گرلز ہائی اسکول میں بھی مختلف بنیادی کام کیے جا رہے ہیں۔
اسکول میں پرانے اور خراب فرنیچر کی مرمت، واش رومز میں پانی کی فراہمی کا انتظام، خراب نلکوں کی تبدیلی اور پرانے دروازوں اور کھڑکیوں کو تبدیل کرنے کا کام کیا جا رہا ہے۔ اس کے علاوہ کلاس رومز، دالانوں اور عمارت کے بیرونی حصوں کو بھی رنگ و روغن کیا جا رہا ہے۔
اسکول کی لائبریری اور کمپیوٹر لیب میں بھی بنیادی سہولیات فراہم کی گئی ہیں۔ طالبات کے لیے ٹیبلٹس بھی رکھے گئے ہیں، جن کے ذریعے مختلف ایپلی کیشنز کی مدد سے مختلف مضامین پڑھائے جاتے ہیں۔
ڈیجیٹل ذرائع کی اس سہولت کے باعث طالبات کو روایتی تدریسی طریقہ کار کے ساتھ ساتھ ٹیکنالوجی کے ذریعے بھی تعلیم حاصل کرنے کا موقع مل رہا ہے۔
تقریباً 750 طالبات والے گورنمنٹ گرلز ہائی اسکول قاسم آباد میں اسکول اسپیسفک بجٹ کے تحت میدان میں نئی بینچیں بھی نصب کی گئی ہیں، جہاں طالبات وقفے کے دوران بیٹھ سکتی ہیں۔
اسکول کی اسسٹنٹ ہیڈمسٹریس شوکت آرا کے مطابق اسکول اسپیسفک بجٹ کے اجرا کے بعد سرکاری اسکولوں میں بنیادی سہولیات اور تعلیمی ماحول مزید بہتر ہوگا اور سرکاری اسکولوں کی مجموعی کارکردگی نجی اسکولوں سے بھی بہتر ہو جائے گی۔