کراچی سے ایران کے شہر چاہ بہار کے لیے پہلی فیری سروس جنوری کے تیسرے ہفتے میں شروع کی جا رہی ہے۔
یہ فیری ایک سفر میں دو سو چالیس مسافروں کو لے جانے کی صلاحیت رکھتی ہے جبکہ سفر کا دورانیہ 12 سے 14 گھنٹے ہوگا۔
فیری سروس کا دو طرفہ ٹکٹ پچاس ہزار روپے مقرر کیا گیا ہے۔
حکام کے مطابق یہ سروس جدید، محفوظ اور پائیدار بحری سفر کی سہولت فراہم کرے گی۔
کراچی پورٹ ٹرسٹ میں نئے فیری ٹرمینل کا افتتاح بھی کر دیا گیا ہے۔
وفاقی وزیر برائے بحری امور محمد جنید انور چوہدری نے اس منصوبے کو سیاحت اور پاکستان کی بلیو اکانومی کے لیے ایک اہم پیش رفت قرار دیا۔
فیری سروس ہفتے میں تین راؤنڈ ٹرپ کرے گی۔
اس منصوبے کا مقصد پاکستان اور خطے کے ممالک کے درمیان بحری رابطوں کو مضبوط بنانا ہے۔
حکام کے مطابق اس سروس سے سیاحت کے فروغ کے ساتھ ساتھ تجارت اور عوامی روابط میں بھی اضافہ متوقع ہے۔
نیا فیری ٹرمینل اور بین الاقوامی فیری سروس کراچی کی بحری شناخت کو ایک نئی سمت دے رہی ہے۔