کراچی میں قائم نیشنل انسٹی ٹیوٹ آف چائلڈ ہیلتھ، جسے عام طور پر این آئی سی ایچ کہا جاتا ہے، بچوں کے علاج کے لیے سندھ حکومت کا ایک بڑا سرکاری اور خصوصی طبی ادارہ ہے۔
این آئی سی ایچ 550 بستروں پر مشتمل ہسپتال ہے، جہاں بچوں کو علاج کی مختلف سہولیات مفت فراہم کی جاتی ہیں۔ ادارے کے مطابق یہاں ہر سال 10 لاکھ سے زائد مریضوں کا علاج کیا جاتا ہے، جبکہ روزانہ تقریباً ایک ہزار بچے او پی ڈی میں آتے ہیں۔
تاہم این آئی سی ایچ کی اہمیت صرف کراچی یا سندھ تک محدود نہیں۔ ہسپتال انتظامیہ کے مطابق یہاں سندھ کے علاوہ پنجاب، بلوچستان اور خیبر پختونخوا سے بھی بچے علاج کے لیے لائے جاتے ہیں۔ سرکاری اعداد و شمار کے مطابق این آئی سی ایچ میں تقریباً 50 فیصد مریض دیگر صوبوں سے علاج کے لیے آتے ہیں۔
یعنی پاکستان کے مختلف علاقوں سے خاندان اپنے بچوں کے علاج کے لیے کراچی کے اس سرکاری ہسپتال کا رخ کرتے ہیں۔ این آئی سی ایچ کے مطابق بہت سے خاندان طویل سفر کرکے یہاں پہنچتے ہیں اور بعض اوقات مقامی سطح پر علاج کے اخراجات برداشت نہ کر سکنے کے بعد کراچی آتے ہیں۔ یہاں علاج مفت ہونے کی وجہ سے یہ ہسپتال کم آمدنی والے خاندانوں کے لیے بھی اہم سہارا بن جاتا ہے۔
این آئی سی ایچ کے وارڈ میں جنوبی پنجاب سے آنے والے ایک بچے کی والدہ نے بتایا کہ کراچی کے این آئی سی ایچ میں علاج مفت ہونے کے ساتھ بہتر طبی سہولیات بھی دستیاب ہیں، اسی وجہ سے وہ اپنے بچے کو یہاں لے کر آئیں۔
ساگا ڈیجیٹل کی ٹیم کو ہسپتال کے دورے کے دوران متعدد ایسے خاندان بھی ملے جن کا تعلق پنجاب، بلوچستان اور خیبر پختونخوا سے تھا اور وہ اپنے بچوں کے مفت اور بہتر علاج کے لیے این آئی سی ایچ کراچی آئے تھے۔
این آئی سی ایچ میں بچوں کے لیے ایمرجنسی، سرجری، انتہائی نگہداشت، نوزائیدہ بچوں کی نگہداشت اور دیگر خصوصی طبی سہولیات موجود ہیں۔ ادارے کے مطابق یہاں بچوں کے لیے 24 گھنٹے سرجیکل ایمرجنسی سروس بھی دستیاب ہے، جبکہ بڑی تعداد میں انکیوبیٹرز نوزائیدہ بچوں کی نگہداشت کے لیے استعمال ہوتے ہیں۔
ہسپتال میں میڈیکل آئی سی یو، کمپیوٹرائزڈ ریڈیالوجی، کمپیوٹرائزڈ لیبارٹری، بچوں کے ذیابیطس وارڈ اور بچوں کی نفسیاتی خدمات سمیت مختلف طبی سہولیات بھی موجود ہیں۔
کمپیوٹرائزڈ لیبارٹری کے ذریعے وارڈز سے لیبارٹری رپورٹس تک رسائی اور مریضوں کے علاج کے عمل کو بہتر بنانے کی سہولت فراہم کی گئی ہے۔
این آئی سی ایچ میں ایسے بچوں کا علاج بھی کیا جاتا ہے جنہیں پیچیدہ اور طویل مدتی طبی نگہداشت کی ضرورت ہوتی ہے۔ اسی وجہ سے دور دراز علاقوں سے آنے والے خاندانوں کے لیے یہ ادارہ خاص اہمیت رکھتا ہے۔
دسمبر 2025 میں سندھ حکومت کی جانب سے این آئی سی ایچ میں ایک کروڑ 70 لاکھ امریکی ڈالر کی لاگت سے نئے میڈیکل ٹاور کے منصوبے کا بھی اعلان کیا گیا تھا۔
کراچی میں قائم یہ سرکاری ادارہ ملک کے مختلف صوبوں سے آنے والے بچوں کو مفت خصوصی علاج فراہم کر رہا ہے، جس کے باعث اس کی خدمات کا دائرہ سندھ کی حدود سے کہیں آگے تک پھیل چکا ہے۔