کراچی این آئی سی وی ڈی میں بچوں کے وارڈ میں جدید موبائل ایم آر آئی مشین، پاکستان میں اپنے نوعیت واحد مشین

کراچی کے نیشنل انسٹی ٹیوٹ آف کارڈیو ویسکیولر ڈیزیزز یا این آئی سی وی ڈی میں بچوں کے علاج کے لیے ایک ایسی جدید سہولت شامل کی گئی ہے، جس کے ذریعے ایم آر آئی کے لیے بچے کو وارڈ سے باہر لے جانے کے بجائے اس کے بستر پر ہی ایم آر آئی کی جا سکتی ہے۔
یہ پورٹیبل ایم آر آئی مشین بچوں کے وارڈ میں موجود ہے اور ضرورت کے مطابق مریض کے بستر کے قریب لے جائی جا سکتی ہے۔ خاص طور پر ان بچوں کے لیے یہ سہولت اہم ہے جو انتہائی نگہداشت میں ہوں، کیونکہ ایسے مریض کو مختلف مشینوں اور طبی آلات کے ساتھ ایک الگ ایم آر آئی روم تک منتقل کرنا ایک مشکل عمل ہو سکتا ہے۔
این آئی سی وی ڈی انتظامیہ کے مطابق یہ جدید ایم آر آئی مشین بچوں کے وارڈ میں تشخیص کے عمل کو مزید آسان بنانے کے لیے نصب کی گئی ہے اور پاکستان کے سرکاری شعبے میں اپنی نوعیت کی واحد مشین ہے۔
اس سہولت کی اہمیت صرف جدید ٹیکنالوجی تک محدود نہیں، بلکہ اس کا تعلق ان بچوں کی نگہداشت سے ہے جو پہلے ہی سنگین طبی حالت میں ہسپتال میں زیر علاج ہیں۔
حکومت سندھ کی جانب سے چلنے والی این آئی سی وی ڈی پاکستان کے بڑے سرکاری امراض قلب کے مراکز میں شامل ہے، جہاں بچوں سمیت مریضوں کو دل کے علاج کی مختلف سہولتیں مکمل طور پر مفت فراہم کی جاتی ہیں۔ ادارے میں بچوں کے دل کے پیچیدہ امراض کے علاج، تشخیص، مداخلتی طریقہ علاج اور سرجری کی سہولت بھی موجود ہے۔
نئی پورٹیبل ایم آر آئی سہولت اسی نظام میں تشخیص کے عمل کو مزید بہتر بنانے کی کوشش ہے، جہاں مریض کو ممکنہ حد تک وہیں تشخیص فراہم کی جائے جہاں اس کا علاج جاری ہو۔
این آئی سی وی ڈی میں روزانہ ملک کے مختلف علاقوں سے مریض علاج کے لیے پہنچتے ہیں، اور ادارے کی جانب سے مفت طبی سہولتوں کی وجہ سے کم آمدنی والے خاندانوں کے لیے بھی پیچیدہ امراض قلب کا علاج ممکن ہو پاتا ہے۔
بچوں کے وارڈ میں جدید پورٹیبل ایم آر آئی کی موجودگی اس بات کی ایک مثال ہے کہ سرکاری شعبے کے ہسپتالوں میں جدید تشخیصی سہولتوں کو مریضوں کی ضرورت کے مطابق استعمال کرنے کی کوشش کی جا رہی ہے۔
یعنی اب ایم آر آئی کی سہولت صرف ایک مشین یا الگ کمرے تک محدود نہیں، بلکہ ضرورت پڑنے پر مشین خود مریض کے قریب پہنچ سکتی ہے۔
این آئی سی وی ڈی کے چلڈرن وارڈ کے سربراہ ڈاکٹر عبدالستار شیخ کے مطابق اس جدید ایم آر آئی مشین کی قیمت 50 کروڑ روپے ہے، مگر اس وارڈ میں علاج مکمل طور پر مفت کیا جاتا ہے۔