سندھ کے ضلع تھرپارکر کے ہیڈکواٹر والے شہر مٹھی کے رہائشی نوجوان سروپ کھتری مٹھی سے تقریباً 130 کلومیٹر دور ننگرپارکر میں واقع منفرد پہاڑی سلسلے کارونجھر میں یوگا کرنے جاتے ہیں۔
سروپ کھتری کارونجھر کی پہاڑیوں اور غاروں میں یوگا کرتے ہیں۔
کارونجھر پہاڑی سلسلہ رن آف کچھ کے شمالی کنارے کے پر واقع وسیع رقبے پر پھیلا ہوا ہے۔ کارونجھر کی پہاڑیاں بنیادی طور پر رنگ برنگے گرینائیٹ پتھروں پر مشتعمل ہیں۔ یہاں چائنا کلے کے ذخائر بھی پائے جاتے ہیں۔ کارونجھر پاکستان کی ان چند مقامت میں ایک ہیں، جہاں آج بھی جین مذہب کے مندر موجود ہیں۔
کارونجھر میں مختلف جنگلی جانور پائے جاتے ہیں، جن میں مور اور ہرن شامل ہیں۔ سندھ کی حکومت نے اسے ثقافتی اور ورثہ سائٹ کے طور پر محفوظ قرار دیا ہے۔
مون سون بارش کے بعد اس منفرد پہاڑی سلسلے سے متعدد چھوٹی بڑی ندیاں بہتی ہیں۔
سروپ کھتری کے مطابق وہ ذہنی سکوں اور جسمانی فٹنیس کے لیے یوگا کرتے ہیں۔
ساگا ڈیجیٹل اے آئی سے گفتگو کرتے ہوئے سروپ کھتری نے کہا: ‘کارونجھر کی پہاڑیاں انتہائی پرسکوں ہیں، جہاں کئی اقسام کے درخت، پودے، گھاس کے ساتھ پرندوں کے چہچانے کی آواز ماحول کو فطرت کی قریب کردیتیں ہیں۔
‘مجھے کارونجھر میں یوگا کرتے ہوئے ذہنی سکون کے ساتھ میں اس جگہ یوگا کرکے جسمانی طور پر خود کو انتہائی فٹ سمجھتا ہوں۔’
سروپ کھتری بتاتے ہیں کہ جب وہ دباؤ یا اداسی محسوس کرتے ہیں تو وہ پہاڑوں پر جا کر مخصوص جسمانی مشقیں کرتے ہیں، جس سے انہیں ذہنی اور جسمانی سکون ملتا ہے۔
ان کا کہنا ہے کہ یہ مشقیں کسی مذہبی روایت کے طور پر نہیں بلکہ صحت اور توانائی کے لیے کی جاتی ہیں۔
بقول سروپ کھتری: ‘یہ مشقیں دراصل یوگا کہلاتی ہیں، جو برصغیر کی قدیم روایت ہے اور جسم، ذہن اور سانس کے درمیان توازن قائم کرنے پر زور دیتی ہے۔
‘یوگا کی مختلف اقسام یا ‘آسن’ ہیں، جن میں جسمانی حرکات اور سانس کے مخصوص معمولات شامل ہوتے ہیں۔ مشق کرنے والے اپنے جسم کی لچک، قوت برداشت اور ذہنی توجہ کو بہتر بنا سکتے ہیں۔
‘عام طور پر لوگ یوگا کو ہندومت کے عبادت سمجھتے ہیں، مگر ورزش کی اس اقسم کا مذہب سے کوئی تعلق نہیں۔ یورب، امریکہ سمیت مختلف ممالک کے لوگ یوگا سیکھنا چاہتے ہیں۔
‘کئی ممالک میں ایسی اکیڈمیاں اور ادارے ہیں جہاں یوگا کو مضمون کے طور پر پڑھایا جاتا ہے اور یہ ایک ادائیگی والا تعلیمی کورس ہوتا ہے۔ اس میں طلبہ کو جسمانی حرکات، سانس کے طریقے اور ذہنی توازن کے اصول سکھائے جاتے ہیں۔’
سروپ کھتری کئی سالوں سے یوگا کی مشقیں کررہے ہیں۔