کراچی میں سرکاری ملازمت کا خواب رکھنے والے نوجوانوں کے لیے فریئر ہال کی لائبریری میں مفت سی ایس ایس تیاری کی سہولت موجود ہے۔
کراچی میونسپل کارپوریشن کے زیر انتظام فریئر ہال میں قائم سی ایس ایس کارنر کا مقصد ایسے امیدواروں کو تیاری اور رہنمائی فراہم کرنا ہے جو مہنگی نجی اکیڈمیوں کی فیس برداشت نہیں کر سکتے۔
سی ایس ایس یعنی سینٹرل سپیریئر سروسز پاکستان کا اہم وفاقی مقابلے کا امتحان ہے، جس کے ذریعے وفاقی حکومت کی مختلف سروسز کے لیے افسران کا انتخاب کیا جاتا ہے۔ کامیاب امیدوار پاکستان ایڈمنسٹریٹو سروس، پولیس سروس آف پاکستان، فارن سروس، ان لینڈ ریونیو سروس، پاکستان کسٹمز سروس، انفارمیشن گروپ اور دیگر وفاقی سروسز میں شامل ہو سکتے ہیں۔
سی ایس ایس کا عمل صرف تحریری امتحان تک محدود نہیں، بلکہ امیدواروں کو ابتدائی ٹیسٹ، تحریری امتحان، طبی معائنے، نفسیاتی جائزے اور زبانی امتحان کے مختلف مراحل سے گزرنا ہوتا ہے۔
سی ایس ایس کارنر میں امیدواروں کو مضامین کے انتخاب، تحریری جوابات لکھنے، مطالعے کی منصوبہ بندی اور امتحانی حکمت عملی کے حوالے سے رہنمائی فراہم کی جاتی ہے۔
سی ایس ایس کارنر کے مطابق یہ سہولت اکتوبر 2020 میں قائم کی گئی تھی، تاکہ مالی مشکلات کا شکار امیدواروں کو بھی مسابقتی امتحان کی تیاری کا موقع مل سکے۔ ادارے کے مطابق یہاں تیاری کرنے والے درجنوں امیدوار سی ایس ایس امتحان کامیابی سے پاس کر چکے ہیں۔
فریئر ہال کے انچارج سلیم شاہ کے مطابق سی ایس ایس امتحان پاس کرکے اعلیٰ عہدوں پر فرائض انجام دینے والے افسران بھی اس مرکز میں لیکچر دیتے ہیں۔
کتاب، لائبریری اور تجربہ کار افسران کی رہنمائی کو ایک جگہ جمع کرنے والا یہ مرکز ان نوجوانوں کے لیے اہم سہولت ہے جو اپنی محنت اور قابلیت کے ذریعے پاکستان کی وفاقی سول سروس کا حصہ بننا چاہتے ہیں۔