برٹش کونسل، ویمن آف دی ورلڈ فاؤنڈیشن، اقوام متحدہ کے ادارے یونائیٹڈ نیشنز پاپولیشن فنڈ اور انٹرپرینیورشپ اینڈ کمیونٹی ڈیولپمنٹ انسٹیٹیوٹ کے اشتراک سے ویمن آف دی ورلڈ پاکستان فیسٹیول کے دس سال مکمل ہونے کے موقع پر WOW پاکستان 2026 کا انعقاد کیا جا رہا ہے۔
یہ دو روزہ فیسٹیول 24 اور 25 جنوری 2026 کو بیچ لگژری ہوٹل کراچی میں منعقد ہوگا۔
WOW فیسٹیول خواتین کی کامیابیوں کو خراج تحسین پیش کرنے، صنفی مساوات پر بامعنی مکالمے کو فروغ دینے اور خواتین کو درپیش سماجی و معاشرتی چیلنجز پر گفتگو کے لیے ایک جامع پلیٹ فارم فراہم کرے گا۔
فیسٹیول میں خواتین، بچیوں اور خاندانوں کے لیے ثقافت، فنون، موسیقی، مکالمے اور سیکھنے سے متعلق مختلف پروگرام پیش کیے جائیں گے۔
برٹش کونسل پاکستان کے کنٹری ڈائریکٹر جیمز ہیمپسن نے کہا کہ ہم WOW پاکستان کے دس سال مکمل ہونے کا جشن منا رہے ہیں اور یہ کراچی میں ہونے والی پہلی تقریب سے شروع ہونے والے سفر پر نظر ڈالنے کا ایک اہم موقع ہے۔
ان کا کہنا تھا کہ خواتین اور بچیوں کو اظہار کا موقع دینا اور فنون و ثقافت کی تبدیلی لانے والی طاقت کو بروئے کار لانا ہی WOW کی اصل روح ہے، جبکہ حقیقی تبدیلی کے لیے ضروری آوازوں کو سننا آج پہلے سے کہیں زیادہ اہم ہو چکا ہے۔
WOW پاکستان کی چیئر اور شریک کیوریٹر امنہ شیخ فاروقی نے کہا کہ WOW پاکستان کا آغاز خواتین کی آواز کی اہمیت پر پختہ یقین کے ساتھ کیا گیا تھا۔ ان کے مطابق جب یہ آواز بغیر کسی معذرت کے سنی جاتی ہے تو معاشرہ بدلتا ہے۔
انہوں نے کہا کہ گذشتہ دس برسوں میں ایسے مواقع پیدا کیے گئے جہاں خیالات نے جنم لیا، ہم خیال ہوئے اور پیش قدمی کی، حتیٰ کہ مشکل حالات میں بھی۔ ان کے مطابق اس سال کا عنوان دستک صرف ایک دستک نہیں بلکہ ایک دعویٰ ہے کہ میں یہاں ہوں، اور دس برس بعد بھی ہم سن رہے ہیں، تخلیق کر رہے ہیں اور ایک ایسے مستقبل کی طرف بڑھ رہے ہیں جس کی تشکیل چند نہیں بلکہ مشترکہ کئی آوازوں سے کی جائے گی۔
WOW فاؤنڈیشن کی بانی اور چیف ایگزیکٹو جوڈ کیلی سی بی ای نے کہا کہ جب انہوں نے WOW کی بنیاد رکھی تو ان کا خواب تھا کہ یہ پاکستان میں مضبوطی سے جڑ پکڑے، ایک ایسے ملک میں جہاں خواتین اور لڑکیوں کے لیے رکاوٹیں توڑنے کی ایک بھرپور تاریخ موجود ہے۔
ان کے مطابق دس سال بعد WOW پاکستان تخلیقی صلاحیت، جرات اور اجتماعی عمل کی ایک روشن مثال بن چکا ہے، اور اس موقع پر نہ صرف اب تک کی پیش رفت کا جشن منایا جا رہا ہے بلکہ آئندہ کے لیے نئے عزم کے ساتھ آگے بڑھنے کا پیغام بھی دیا جا رہا ہے۔
WOW پاکستان 2026 کو ہر فرد کے لیے قابل رسائی بنانے کے لیے خصوصی انتظامات کیے گئے ہیں، جن میں اشاروں کی زبان کی سہولت، بریل مواد اور وہیل چیئر کے لیے موزوں راستے اور ریمپس شامل ہیں۔
فیسٹیول کے پروگرام میں افتتاحی سیشن شامل ہوگا جس میں سینیٹر شیری رحمان، جوڈ کیلی سی بی ای اور برطانوی ہائی کمشنر برائے پاکستان جین میریٹ شریک ہوں گی، جبکہ نظامت معروف صحافی صدیرا اقبال کریں گی۔
پروگرام میں معروف کتھک فنکارہ نگہت چوہدری کی پرفارمنس، موسیقی کی محفل جس میں نتاشا بیگ اور بابر شیخ شامل ہوں گے، لوک موسیقی کے فنکار استاد نور بخش کی پیشکش، اے آئی اور کوڈڈ عدم مساوات پر پینل ڈسکشن جس کی میزبانی عنبر شمسی کریں گی۔
کینسر، تخلیق اور حوصلے پر انجلین ملک کے ساتھ فائر سائیڈ چیٹ، سرمایہ کاری پر مشعل خان کی ماسٹر کلاس، سندھی فنکاروں کی خصوصی پرفارمنس، عدنان جہانگیر اور صاحبزادیوں کی پیشکش Unfolding، بچوں کے لیے کہانیوں اور گیتوں کا سیشن خالد انعم کے ساتھ، اور گرپس تھیٹر کی پرفارمنس شامل ہے۔
اس سال کا موضوع دستک، ایک نئی دنیا دروازہ کھٹکھٹا رہی ہے، خواتین کی دس سالہ جدوجہد، قیادت اور تبدیلی کے سفر کی علامت ہے۔ یہ موضوع اس مقام کو تسلیم کرنے کی دعوت دیتا ہے جہاں ہم آج کھڑے ہیں اور اس مستقبل کا دروازہ کھولنے کا پیغام دیتا ہے جو مشترکہ قیادت اور نئے بیانیوں سے تشکیل پائے گا۔
WOW فیسٹیول کے ذریعے برٹش کونسل خواتین کو اپنی آواز بلند کرنے، نظامی رکاوٹوں کو چیلنج کرنے اور اپنی کامیابیوں کا جشن منانے کے مواقع فراہم کرتا رہے گا۔