کراچی میں واقع کیفے چُلو کباب سیستانی آج بھی شہریوں کی توجہ کا مرکز بنا ہوا ہے، جہاں دن کے مختلف اوقات میں لوگوں کا خاصا رش دیکھنے کو ملتا ہے۔
اس ایرانی کیفے میں شہری نہ صرف روایتی ایرانی کھانوں سے لطف اندوز ہوتے ہیں بلکہ ایک تاریخی ذائقے کا تجربہ بھی حاصل کرتے ہیں۔ایرانی زبان میں چاول کو ‘چُلو’ کہا جاتا ہے اور چُلو کباب کا مطلب چاول اور کباب ہے۔
ایرانی کھانوں میں چاول بنیادی جزو کے طور پر استعمال ہوتے ہیں۔ چُلو کباب میں خوشبودار چاولوں کے ساتھ سیخ کباب، مکھن کا تڑکا اور مخصوص مصالحے شامل کیے جاتے ہیں جو اس ڈش کو ایک منفرد ذائقہ ہوتا ہے۔
ماضی میں کراچی کے مختلف علاقوں اور چوراہوں پر ایرانی کیفے عام نظر آتے تھے، جو اکثر گلی کے کونوں پر قائم ہوتے تھے، تاہم وقت کے ساتھ ان کی تعداد نہ ہونے کے برابر رہ گئی ہے۔
آج جو چند قدیم ایرانی کیفے باقی ہیں، ان میں سے بیشتر اصل مالکان کی تیسری یا چوتھی نسل کے زیرِ انتظام ہیں، جو اس روایت کو اب تک زندہ رکھے ہوئے ہیں۔
چُلو کباب سیستانی کو ایرانی کھانوں کا ایک اہم مرکز سمجھا جاتا ہے، جہاں چلو کباب کے ساتھ ساتھ ملائی بوٹی، تکہ، اور دیگر مختلف کھانے بھی دستیاب ہیں۔
یہاں نہ صرف شہر بھر سے بلکہ دنیا کے مختلف ممالک سے آنے والے افراد بھی ایرانی کھانوں کا ذائقہ چکھنے پہنچتے ہیں۔ یہ کیفے ایک قدیم عمارت میں قائم ہے، جہاں آج بھی پرانا فرنیچر اور روایتی ماحول ماضی کی یاد دلاتا ہے، جو اسے جدید کیفیز سے منفرد بناتا ہے۔
شہریوں کے مطابق کراچی میں پرانے ایرانی کیفے اب بہت کم رہ گئے ہیں، اسی لیے وہ چلو کباب سیستانی آکر مستند ایرانی کھانوں سے لطف اندوز ہوتے ہیں۔ اگرچہ یہاں مختلف اقسام کے کھانے دستیاب ہیں، تاہم چلو کباب کا ذائقہ آج بھی سب سے منفرد اور یادگار سمجھا جاتا ہے۔