کراچی: محکمہ صحت سندھ کی جانب سے ڈاکٹر رتھ فاؤ سول ہسپتال کراچی میں مریضوں کو جدید تشخیصی اور طبی سہولیات فراہم کرنے کے لیے نئی مشینری اور طبی آلات فراہم کیے گئے ہیں۔
حالیہ مرحلے میں ہسپتال کے ریڈیالوجی شعبے کو نئی میموگرافی اور فائبرو اسکین مشینیں فراہم کی گئی ہیں، جبکہ مرکزی لیبارٹری کے لیے جدید رینڈاکس لیبارٹری سسٹمز بھی حاصل کیے گئے ہیں۔
ہسپتال کی ریڈیالوجی سروس میں پہلے ہی ڈیجیٹل میموگرافی، فائبرو اسکین، الٹراساؤنڈ، سی ٹی اسکین اور ایم آر آئی سمیت مختلف تشخیصی سہولیات دستیاب ہیں۔ نئی میموگرافی مشین کی فراہمی سے بریسٹ کی بیماریوں کی تشخیص کی صلاحیت میں مزید اضافہ ہوگا۔ ریڈیالوجی شعبے میں میموگرافی کے ساتھ اسٹیریوٹیکٹک بایوپسی کی سہولت بھی موجود ہے۔
فائبرو اسکین جگر کی بیماریوں کی تشخیص اور جگر میں فائبروسس کی شدت کا جائزہ لینے کے لیے استعمال ہونے والی غیر مداخلتی ٹیکنالوجی ہے۔ نئی مشین کی فراہمی سے اس تشخیصی سروس کی گنجائش بڑھانے میں مدد ملے گی۔
اس کے علاوہ ہسپتال کے لیے لیپروسکوپی سمیت دیگر طبی آلات، لیبارٹری کا سامان اور فرنیچر بھی حاصل کیا گیا ہے۔ لیپروسکوپی کم مداخلت والی سرجری کے لیے استعمال ہوتی ہے اور جدید جراحی طریقوں کے ذریعے مریضوں کے علاج میں معاون ثابت ہوتی ہے۔
ڈاکٹر رتھ فاؤ سول ہسپتال کراچی میں مریضوں کا یومیہ بوجھ بھی نمایاں ہے۔ ہسپتال انتظامیہ کے مطابق روزانہ تقریباً چھ سے سات ہزار مریض او پی ڈی میں آتے ہیں، جبکہ مختلف شعبوں میں بڑی تعداد میں مریض زیر علاج بھی رہتے ہیں۔
اتنی بڑی تعداد میں مریضوں کو خدمات فراہم کرنے والے سرکاری تدریسی ہسپتال میں جدید تشخیصی مشینری کی دستیابی تشخیص کی صلاحیت بڑھانے اور مریضوں کو بروقت طبی خدمات فراہم کرنے میں اہم کردار ادا کرتی ہے۔
ہسپتال میں مزید مشینری اور طبی آلات کی ضرورت بھی برقرار ہے۔ انتظامیہ کی جانب سے اضافی آلات کے حصول کے لیے مزید ڈیمانڈز بھی متعلقہ حکام کو بھیجی گئی ہیں۔
ڈاکٹر رتھ فاؤ سول ہسپتال کراچی کے میڈیکل سپرنٹنڈنٹ ڈاکٹر سید محمد خالد بخاری کے مطابق جدید تشخیصی اور طبی سہولیات کی فراہمی کے ساتھ ہسپتال میں آگ بجھانے والے آلات بھی نصب کیے گئے ہیں، جبکہ متعلقہ اسٹاف کی تربیت کا عمل بھی جاری ہے۔
ہسپتال کا مقصد کراچی کے علاوہ سندھ کے مختلف علاقوں سے آنے والے مریضوں کو ایک بڑے سرکاری تدریسی ہسپتال میں جدید تشخیصی اور طبی سہولیات فراہم کرنا ہے۔