ترکیہ کی ایک ٹیکنالوجی کمپنی نے ایک جدید ایپ متعارف کرائی ہے جس کے ذریعے صارفین اپنے چہرے کا ڈیجیٹل لائسنس حاصل کر سکتے ہیں۔ اس اقدام کا مقصد افراد کو یہ اختیار دینا ہے کہ ان کے چہرے کو مصنوعی ذہانت (AI) یا ڈیپ فیک مواد میں ان کی اجازت کے بغیر استعمال نہ کیا جا سکے۔
مثال کے طور پر اگر آپ کسی شعبے کی معروف شخصیت، انفلوئنسر یا پبلک فگر ہیں تو آپ کی تصاویر اور ویڈیوز کو استعمال کرکے جعلی اشتہارات، پروموشنل مواد یا گمراہ کن ویڈیوز تیار کی جا سکتی ہیں۔ تاہم، چہرے کا باقاعدہ اے آئی لائسنس حاصل ہونے کی صورت میں آپ اپنے ڈیجیٹل حقوق کا تحفظ کر سکتے ہیں اور بعض صورتوں میں اپنے اے آئی ورژن کے استعمال کے بدلے معاوضہ بھی حاصل کر سکتے ہیں۔
لائسنس کیسے مل سکتا ہے؟
یہ ایپ صارف کے چہرے کے مختلف زاویوں، تاثرات اور ویڈیو ریکارڈنگز کو محفوظ طریقے سے جمع کرتی ہے۔ بعد ازاں اس ڈیٹا کو ایک منفرد ڈیجیٹل شناخت میں تبدیل کیا جاتا ہے۔ اس شناخت کی مدد سے صارف یہ طے کر سکتا ہے کہ کون فرد یا ادارہ اس کی تصویر، ویڈیو یا اے آئی سے تیار کردہ ورژن کو استعمال کرنے کا مجاز ہوگا اور کون نہیں۔