Tag: چاند

آپ کی جیب خالی ہو، زندگی مشکلات میں گھری ہو، اور اچانک آپ آسمان کی طرف دیکھیں، اور فیصلہ کریں کہ آپ چاند بیچیں گے۔ یہ کسی فلم کی کہانی لگتی ہے، لیکن یہ حقیقت ہے۔

یہ کہانی ہے ڈینس ہوپ کی، ایک عام امریکی شہری، جس کی زندگی میں سب کچھ ٹھیک نہیں چل رہا تھا۔ طلاق ہو چکی تھی، مالی مشکلات تھیں، اور مستقبل دھندلا تھا۔ لیکن ایک دن اس نے سوچا، اگر زمین پر کچھ نہیں بچا، تو کیوں نہ چاند بیچ دیا جائے؟

یہ خیال عجیب تھا،  لیکن اس نے اسے مذاق نہیں سمجھا، بلکہ تحقیق شروع کر دی۔

1980 میں ڈینس ہوپ لائبریری گیا اور 1967 کا ایک اہم معاہدہ پڑھا، جسے Outer Space Treaty کہا جاتا ہے۔ اس کے مطابق چاند اور خلا کسی ایک ملک کی ملکیت نہیں ہو سکتا۔ لیکن یہاں ایک دلچسپ نکتہ تھا،

اس معاہدے میں صرف ممالک کو روکا گیا تھا، عام افراد کا ذکر واضح نہیں تھا۔

اور یہی وہ loophole تھا جسے ڈینس ہوپ نے اپنی قسمت بنا لیا۔ اس نے اقوام متحدہ کو ایک نوٹس بھیجا، جس میں اس نے نہ صرف چاند بلکہ پورے شمسی نظام پر ملکیت کا دعویٰ کر دیا۔

اور حیران کن بات، کوئی جواب نہیں آیا۔

ڈینس ہوپ نے اس خاموشی کو منظوری سمجھ لیا، اور شروع ہو گیا ایک نیا کاروبار۔ چاند پر پلاٹس کی فروخت۔جی ہاں، باقاعدہ پلاٹس، باقاعدہ سرٹیفکیٹس کے ساتھ۔

کم لوگوں کو یہ معلوم ہے کہ اس نے اپنی کمپنی Lunar Embassy کے نام سے رجسٹر کروائی، اور دعویٰ کیا کہ اس نے لاکھوں ایکڑ زمین بیچ دی ہے۔ یہاں تک کہ کچھ مشہور شخصیات نے بھی یہ ’چاندی پلاٹس‘ خریدے۔

ایک اور دلچسپ حقیقت، وہ زمین صرف ایک ڈالر فی ایکڑ کے حساب سے بیچنا شروع ہوئی۔

لیکن کیا یہ سب قانونی ہے؟

یہاں کہانی تھوڑی پیچیدہ ہو جاتی ہے۔ماہرین قانون کے مطابق، خلا اب بھی پوری انسانیت کی مشترکہ ملکیت ہے۔ کوئی فرد، چاہے وہ کتنا ہی ذہین کیوں نہ ہو، چاند کا مالک نہیں بن سکتا۔

یونیورسٹی آف پینسلوینیا کی ماہر قانون، پروفیسر کلیئر فنکل اسٹائن نے بھی واضح کیا کہ یہ دعویٰ قانونی طور پر تسلیم شدہ نہیں۔

لیکن اس سب کے باوجود، لوگ آج بھی چاند کے پلاٹس خرید رہے ہیں۔

یہ کہانی صرف ایک کاروبار کی نہیں، یہ imagination، loopholes، اور انسانی ذہانت کی بھی کہانی ہے۔

ایک شخص نے قانون کی خاموشی کو موقع بنایا، اور ایک ایسا خواب بیچ دیا، جو حقیقت میں کسی کا نہیں تھا۔

ساگا ڈیجیٹل آپ کے لیے ایسی ہی حیران کن کہانیاں لاتا ہے جہاں حقیقت اور حیرت ایک ساتھ چلتی ہیں۔ ساگا ڈیجیٹل کے ساتھ جڑے رہیے، کیونکہ کہانی ابھی باقی ہے۔

انسانی عزم کی نشانی ‘اورین’ (Orion) کیپسول میں چار خلاباز زمین سے لاکھوں کلومیٹر دور، 28,000 کلومیٹر فی گھنٹہ کی ہیبت ناک رفتار سے چاند کی جانب گامزن ہیں۔ یہ محض ایک سفر نہیں بلکہ انسانی تاریخ کے ایک نئے باب کا آغاز ہے۔

یقیناً نیل آرم اسٹرانگ آج زندہ ہوتے تو انہیں یہ دیکھ کر بے حد خوشی ہوتی کہ جس چاند پر انہوں نے پہلا قدم رکھا تھا، اب وہاں انسانوں کی چہل قدمی ایک معمول بننے والی ہے۔ جب سے انسان نے سائنس اور ٹیکنالوجی پر دسترس حاصل کی، خلا کی وسعتوں کو تسخیر کرنا اس کی اولین ترجیح رہی ہے۔

اپالو سے آرٹیمس تک: جڑواں بہن بھائیوں کی داستان

ستر کی دہائی میں ‘اپالو’ مشن کے ذریعے انسان نے چاند کو سر تو کر لیا تھا، لیکن اب ‘آرٹیمس’ کے ذریعے وہاں مستقل قیام کی آرزو جاگی ہے۔ یونانی اساطیر (Mythology) کے مطابق ‘آرٹیمس’ چاند کی دیوی اور طاقتور ترین ہستی مانی جاتی ہے، جو ‘اپالو’ کی جڑواں بہن تھی۔ اسی مناسبت سے ناسا نے اپنے پہلے مشن کا نام اپالو اور اب اس نئے عہد کے مشن کا نام آرٹیمس رکھا ہے، جو اس بار ‘پہلی خاتون’ اور ‘پہلے غیر سفید فام’ انسان کو چاند کی سطح پر اتارنے کا عزم لیے ہوئے ہے۔

آرٹیمس ٹو: تجربہ اور تیاری

امریکی خلائی ادارے ناسا کا ‘آرٹیمس II’ مشن دراصل اس عظیم سلسلے کی دوسری کڑی ہے۔ اگرچہ ترقی یافتہ معاشروں میں ایسے مشن معمول کا حصہ سمجھے جاتے ہیں، تاہم پاکستان جیسے ممالک میں یہ تجسس اور حیرانی کا باعث ہیں۔ یہ مشن محض چاند کے گرد چکر لگانے تک محدود نہیں، بلکہ یہ اس ‘اسپیس لانچ سسٹم’ (SLS) کی جانچ ہے جو دنیا کا طاقتور ترین راکٹ ہے۔

آرٹیمس II کے چار جری خلاباز—کمانڈر ریڈ وائیزمین، پائلٹ وکٹر گلاور، مشن اسپیشلسٹ کرسٹینا کوچ اور جیرمی ہینسن—چاند کے گرد ‘فری ریٹرن ٹریجیکٹری’ (Free Return Trajectory) پر سفر کر رہے ہیں۔ اس کا مطلب ہے کہ یہ خلائی جہاز چاند کی کششِ ثقل کو ایک غلیل (Slingshot) کی طرح استعمال کرتے ہوئے قدرتی طور پر زمین کی طرف واپس مڑے گا۔ اس 10 روزہ سفر کے دوران یہ خلاباز چاند کی سطح سے محض 7,400 کلومیٹر اوپر سے گزریں گے تاکہ وہاں کے ماحول، تابکاری (Radiation) اور اورین کیپسول کے لائف سپورٹ سسٹم کا باریک بینی سے معائنہ کر سکیں۔

چاند کا قطب جنوبی اور ‘برفانی پانی’ کی تلاش

ناسا کا اصل ہدف چاند کا وہ قطب جنوبی (South Pole) ہے جہاں آج تک کوئی انسان نہیں پہنچا۔ سائنسی تحقیق کے مطابق یہاں کے تاریک گڑھوں میں ‘برف’ کی صورت میں پانی موجود ہے۔ یہ پانی مستقبل کے خلابازوں کے لیے پینے، آکسیجن بنانے اور سب سے بڑھ کر راکٹ فیول (ہائیڈروجن اور آکسیجن)

کی تیاری میں کام آئے گا۔ یہی وہ ایندھن ہے جو چاند کو ایک ‘اسپیس اسٹیشن’ یا پیٹرول پمپ میں بدل دے گا، جہاں سے انسان مریخ (Mars) کی طویل مسافت طے کر سکے گا۔

مستقبل کے مراحل: آرٹیمس III اور گیٹ وے

آرٹیمس II کی کامیابی دراصل آرٹیمس III کی راہ ہموار کرے گی، جو 2026 کے آخر تک انسان کو چاند کی سطح پر اتارے گا۔ ناسا کا منصوبہ صرف چاند پر اترنا نہیں بلکہ چاند کے مدار میں ایک چھوٹا خلائی اسٹیشن بنانا ہے جسے ‘گیٹ وے’ (Gateway) کہا جائے گا۔ یہ اسٹیشن چاند کی سطح پر جانے اور وہاں سے مریخ کی طرف روانہ ہونے کے لیے ایک مستقل بیس کے طور پر کام کرے گا۔

خلائی سیاست اور معیشت

تقریباً 93 ارب ڈالر کی خطیر لاگت سے تیار ہونے والا یہ پروجیکٹ محض سائنسی نہیں بلکہ تزویراتی (Strategic) بھی ہے۔ سابق امریکی صدر ڈونلڈ ٹرمپ کے دور میں شروع ہونے والی خصوصی فنڈنگ اور موجودہ انتظامیہ کی سپورٹ اس بات کا واضح اشارہ ہے کہ امریکہ خلائی دوڑ میں چین (China) سے پیچھے نہیں رہنا چاہتا۔ چین کا ہدف بھی 2030 تک اپنے خلاباز چاند پر اتارنا ہے، جس نے اس ‘نیو اسپیس ریس’ کو مزید تیز کر دیا ہے۔

انسان جب چاند یا مریخ پر بستیاں بسانے کا خواب دیکھتا ہے تو ایک بنیادی سوال سامنے آتا ہے: وہاں خوراک کہاں سے آئے گی؟ زمین سے ہر چیز خلا میں بھیجنا انتہائی مہنگا اور مشکل کام ہے۔ اسی لیے سائنس دان برسوں سے یہ جاننے کی کوشش کر رہے ہیں کہ کیا خلا میں بھی پودے اگائے جا سکتے ہیں۔

اب ایک نئی تحقیق نے اس سوال کے جواب کی طرف ایک اہم قدم بڑھایا ہے۔ سائنس دانوں کا کہنا ہے کہ اگر مستقبل میں چاند پر انسانی بستیاں قائم ہوئیں تو وہاں اگائی جانے والی پہلی فصلوں میں چنے بھی شامل ہو سکتے ہیں۔

ماہرین کے مطابق چاند کی سطح پر زمین جیسی عام مٹی موجود نہیں ہوتی۔ وہاں کی سطح کو ریگولتھ کہا جاتا ہے، جو دراصل باریک پتھروں اور گرد پر مشتمل مادّہ ہے۔ اس میں وہ نامیاتی اجزا اور خرد حیاتیات نہیں ہوتے جو زمین کی مٹی میں پودوں کی نشوونما کے لیے ضروری سمجھے جاتے ہیں۔

اسی چیلنج کو سامنے رکھتے ہوئے یونیورسٹی آف ٹیکساس کے محققین نے تجربہ گاہ میں چاند جیسی مصنوعی مٹی تیار کی۔ اس مٹی میں چنے کے بیج بوئے گئے اور اسے غذائیت دینے کے لیے کیچوؤں سے بننے والی نامیاتی کھاد، یعنی ورمی کمپوسٹ، اور مفید فنگس شامل کی گئی۔

تجربے کے نتائج حیران کن تھے۔ چنے کے پودے نہ صرف اگے بلکہ انہوں نے بیج بھی پیدا کیے۔ تحقیق کے مطابق پودوں کی نشوونما اس وقت زیادہ بہتر رہی جب مٹی کے آمیزے میں تقریباً پچھتر فیصد تک چاند جیسی گرد شامل تھی۔ تاہم جب پودوں کو مکمل طور پر اسی مادّے میں اگانے کی کوشش کی گئی تو وہ پھول اور بیج پیدا نہیں کر سکے۔

چنے ہی کیوں منتخب کیے گئے؟

سائنس دانوں نے اس تجربے کے لیے چنوں کا انتخاب بھی سوچ سمجھ کر کیا۔ چنے غذائیت سے بھرپور ہوتے ہیں اور خاص طور پر پروٹین کا اہم ذریعہ سمجھے جاتے ہیں۔ اس کے علاوہ یہ نسبتاً کم پانی اور کم کھاد میں بھی اگ سکتے ہیں، اسی لیے انہیں خلا میں ممکنہ خوراکی فصل کے طور پر موزوں سمجھا جا رہا ہے۔

خلا کی مہمات کے لیے اس تحقیق کی اہمیت

ماہرین کے مطابق مستقبل میں اگر انسان چاند یا مریخ پر طویل عرصے تک رہنے لگتے ہیں تو خوراک کی مقامی پیداوار انتہائی ضروری ہو جائے گی۔ ایسی فصلیں نہ صرف خلانوردوں کو خوراک فراہم کر سکتی ہیں بلکہ پودوں کے ذریعے ماحول میں آکسیجن پیدا کرنے میں بھی مدد مل سکتی ہے۔

تاہم ابھی ایک اہم سوال باقی ہے۔ سائنس دان یہ جاننے کی کوشش کر رہے ہیں کہ چاند جیسی مٹی میں اگائے گئے یہ چنے انسانوں کے لیے مکمل طور پر محفوظ بھی ہوں گے یا نہیں۔ اس مقصد کے لیے ان پودوں میں دھاتوں کی مقدار اور غذائی خصوصیات کا مزید تجزیہ کیا جا رہا ہے۔

اگر یہ تجربات کامیاب رہے تو ممکن ہے کہ مستقبل میں چاند پر بسنے والے انسانوں کی خوراک میں وہی چیز شامل ہو جو جنوبی ایشیا اور پاکستان میں صدیوں سے روزمرہ غذا کا حصہ رہی ہے، یعنی چنے۔

ساگا ڈیجیٹل ایسے ہی سائنسی سوالات اور نئی تحقیقات کو سادہ اور دلچسپ انداز میں آپ تک پہنچاتا ہے، تاکہ پیچیدہ موضوعات کو سمجھنا ہر قاری کے لیے آسان ہو سکے۔