برطانیہ کے شہر بلیک برن میں واقع تاریخی ہیر اینڈ ہاؤنڈز پب، جو 1799 میں قائم کیا گیا تھا، مقامی کونسل کی منظوری کے بعد مسجد میں تبدیل کیا جا رہا ہے۔ یہ عمارت گزشتہ برس اکتوبر میں بند کر دی گئی تھی کیونکہ اسے منافع بخش کاروبار کے طور پر جاری رکھنا ممکن نہیں رہا تھا۔
برطانوی نشریاتی ادارے جی بی نیوز کی رپورٹ کے مطابق درخواست لامیک کمیونٹی ایسوسی ایشن کی جانب سے دی گئی، جو اپنی موجودہ عبادت گاہ کے محدود ہونے کے باعث ایک بڑی جگہ کی تلاش میں تھی۔ کونسل کی منصوبہ بندی کمیٹی نے عمارت کو عبادت گاہ میں تبدیل کرنے کی منظوری دے دی ہے۔
ہیر اینڈ ہاؤنڈز پب کی بنیاد 1799 میں رکھی گئی تھی۔ یہ بلیک برن کے قدیم ترین پبوں میں شمار ہوتا ہے اور تاریخی ڈٹنز بریوری سے وابستہ آخری فعال پب بھی تھا۔ اس کی بندش کے ساتھ اس تاریخی سلسلے کا بھی اختتام ہو گیا۔
منصوبے کے تحت تاریخی عمارت کو منہدم نہیں کیا جائے گا بلکہ اس کی اصل ساخت کو برقرار رکھتے ہوئے مسجد میں تبدیل کیا جائے گا۔ اس مقصد کے لیے ایک نئی توسیع تعمیر کی جائے گی، جس میں وضو کی جگہ، بیت الخلا اور دیگر سہولیات شامل ہوں گی، جبکہ پہلی منزل پر دفتر، لائبریری، باورچی خانہ اور اسٹوریج قائم کیا جائے گا۔
درخواست گزاروں کے مطابق گزشتہ 25 برسوں کے دوران علاقے کی آبادی میں نمایاں تبدیلی آئی ہے۔ 2021 کی مردم شماری کے مطابق اس وارڈ کی تقریباً 66 فیصد آبادی ایشیائی نسل سے تعلق رکھتی ہے، جبکہ موجودہ عبادت گاہ مقامی مسلم برادری کی ضروریات پوری کرنے کے لیے ناکافی ہو چکی تھی۔
منصوبے پر غور کے دوران بعض مقامی رہائشیوں نے ٹریفک اور پارکنگ کے مسائل پر اعتراضات بھی اٹھائے، جس کے بعد کونسل نے پارکنگ کے انتظامات سمیت متعدد شرائط عائد کرتے ہوئے منصوبے کی منظوری دی۔
برطانیہ میں حالیہ برسوں کے دوران معاشی دباؤ، بدلتی سماجی عادات اور گاہکوں کی کم ہوتی تعداد کے باعث متعدد تاریخی پب بند ہو چکے ہیں۔ ان میں سے کئی عمارتوں کو رہائشی، تجارتی، کمیونٹی اور مذہبی مقاصد کے لیے دوبارہ استعمال میں لایا جا رہا ہے۔