مشہور بھارتی اداکارہ اور ٹی وی سیلیبرٹی راکھی ساونت نے کہا ہے کہ انہوں نے ایک مسلمان شخص سے شادی کے بعد اسلام قبول کیا، اپنا نام فاطمہ رکھا اور اب تک آٹھ مرتبہ عمرہ ادا کر چکی ہیں۔ انہوں نے یہ بھی دعویٰ کیا کہ وہ پانچ وقت کی نماز پڑھتی ہیں، قرآن اور بائبل دونوں کا مطالعہ کرتی ہیں اور تمام انبیائے کرام کا احترام کرتی ہیں۔
یہ بات انہوں نے بی بی سی ہندی کو دیے گئے ایک انٹرویو میں کہی، جس میں انہوں نے اپنی مذہبی زندگی، شادی، اسلام قبول کرنے اور مختلف مذاہب کے بارے میں اپنے خیالات کا اظہار کیا۔
راکھی ساونت نے بتایا کہ انہوں نے ایک مسلمان نوجوان سے محبت کے بعد شادی کی تھی اور اسی دوران اسلام قبول کیا۔ ان کے بقول، نکاح کے بعد ان کا نام فاطمہ رکھا گیا، تاہم یہ شادی صرف چھ ماہ تک برقرار رہی۔ انہوں نے کہا کہ شادی ختم ہونے کے باوجود ان کا اللہ پر ایمان برقرار ہے۔
اداکارہ نے کہا کہ لوگ یہ تاثر نہ دیں کہ کسی ہندو خاتون کا مسلمان شخص سے شادی کرنا کوئی غیر معمولی بات ہے۔ انہوں نے کہا کہ بھارت میں ہندو اور مسلمان مختلف مذاہب میں شادیاں کرتے رہتے ہیں اور فلمی دنیا میں بھی ایسی کئی مثالیں موجود ہیں۔ انہوں نے بالی ووڈ کے اداکاروں شاہ رخ خان اور عامر خان کا حوالہ دیتے ہوئے کہا کہ مختلف مذاہب میں شادی کرنا نئی بات نہیں ہے۔
راکھی ساونت نے دعویٰ کیا کہ نکاح اور مذہب کی تبدیلی کے بعد انہیں عمرہ کرنے کی اجازت ملی اور وہ اب تک آٹھ مرتبہ عمرہ ادا کر چکی ہیں۔ انہوں نے کہا کہ انہیں اس پر خوشی اور فخر ہے۔
بی بی سی ہندی کی میزبان نے جب ان سے پوچھا کہ وہ اس وقت کس مذہب پر عمل کر رہی ہیں تو راکھی ساونت نے جواب دیا کہ وہ اللہ پر ایمان رکھتی ہیں اور حضرت محمد ﷺ، حضرت عیسیٰ علیہ السلام، حضرت یوسف علیہ السلام، حضرت یعقوب علیہ السلام سمیت تمام انبیائے کرام کا احترام کرتی ہیں۔ انہوں نے کہا کہ اللہ ایک ہے اور تمام انبیاء اس کے برگزیدہ پیغمبر ہیں، اس لیے وہ سب کی عزت کرتی ہیں اور لوگوں کو بھائی چارے کا پیغام دیتی ہیں۔
انہوں نے بتایا کہ انہیں اردو زبان نہیں آتی، تاہم وہ مذہبی تعلیمات سے اپنی استطاعت کے مطابق آگاہی حاصل کرنے کی کوشش کرتی ہیں۔
انٹرویو کے دوران راکھی ساونت نے کہا کہ وہ حضرت عیسیٰ علیہ السلام پر بھی ایمان رکھتی ہیں اور چرچ بھی جاتی ہیں۔ ان کے مطابق وہ کئی برس دبئی میں رہنے کی وجہ سے باقاعدگی سے چرچ نہیں جا سکیں، لیکن ممبئی واپسی کے بعد دوبارہ چرچ جانا شروع کر دیا ہے۔
انہوں نے کہا کہ ان کی والدہ بائبل پڑھا کرتی تھیں، اسی وجہ سے وہ حضرت عیسیٰ علیہ السلام سے بھی عقیدت رکھتی ہیں۔ ان کے بقول وہ کسی بھی مذہب یا مذہبی شخصیت کے خلاف بات سننا پسند نہیں کرتیں۔
جب میزبان نے سوال کیا کہ کیا وہ واقعی اسلامی تعلیمات پر عمل کرتی ہیں یا یہ سب صرف عوامی توجہ حاصل کرنے کے لیے ہے، تو راکھی ساونت نے کہا کہ وہ پانچ وقت کی نماز ادا کرتی ہیں۔ انہوں نے فجر، ظہر، عصر، مغرب اور عشاء کی نمازوں کی رکعات کا ذکر کرتے ہوئے کہا کہ وہ تہجد کی نماز بھی پڑھتی ہیں۔
راکھی ساونت نے مزید دعویٰ کیا کہ وہ قرآن مجید اور بائبل دونوں کا مطالعہ کرتی ہیں۔ ان کے مطابق وہ قرآن کی مختلف سورتیں پڑھتی ہیں اور اپنی روزمرہ زندگی میں مذہبی تعلیمات پر عمل کرنے کی کوشش کرتی ہیں۔
انٹرویو کے دوران انہوں نے اس بات کا بھی ذکر کیا کہ بعض لوگ انہیں مسلمان تسلیم نہیں کرتے۔ اس پر انہوں نے کہا کہ انہیں اس بات کی پروا نہیں کیونکہ ان کے نزدیک ایمان انسان اور اللہ کے درمیان کا معاملہ ہے۔ انہوں نے کہا کہ کچھ لوگ ان کے فلمی پیشے اور لباس کی وجہ سے انہیں مسلمان نہیں مانتے، لیکن وہ اس تنقید کو اہمیت نہیں دیتیں۔
راکھی ساونت نے کہا کہ ان کے ناقدین میں ایسے لوگ بھی ہیں جنہیں ایک بار بھی عمرہ کرنے کا موقع نہیں ملا، جبکہ وہ آٹھ مرتبہ عمرہ ادا کر چکی ہیں۔ ان کے مطابق وہ اپنی مذہبی زندگی کو ذاتی معاملہ سمجھتی ہیں اور کسی کی رائے سے ان کے عقیدے پر فرق نہیں پڑتا۔
واضح رہے کہ راکھی ساونت ماضی میں بھی اپنی ذاتی زندگی، شادی، مذہبی معاملات اور متنازع بیانات کے باعث خبروں میں رہتی آئی ہیں۔ ان کا تازہ انٹرویو بھی سوشل میڈیا پر توجہ حاصل کر رہا ہے۔