لندن کے تاریخی دریائے ٹیمز کے شمالی کنارے وکٹوریہ ایمبینکمنٹ پر واقع بیٹل آف برطانیہ یادگار برطانیہ کی دوسری عالمی جنگ کی تاریخ کا ایک اہم نشان ہے۔ یہ یادگار ان ہزاروں پائلٹوں اور فضائی عملے کی یاد میں تعمیر کی گئی جنہوں نے 1940 میں نازی جرمنی کے فضائی حملوں کے خلاف برطانیہ کا دفاع کیا تھا۔
بیٹل آف برطانیہ دوسری عالمی جنگ کی ایک فیصلہ کن فضائی لڑائی تھی جو جولائی سے اکتوبر 1940 تک جاری رہی۔ اس جنگ میں برطانوی رائل ایئر فورس نے جرمن فضائیہ لوفت وافے کو برطانیہ پر حملے سے روکنے میں کامیابی حاصل کی۔ بعد ازاں برطانوی وزیر اعظم ونسٹن چرچل نے ان پائلٹوں کو ‘دی فیو’ یعنی ‘وہ چند لوگ’ قرار دیا جن پر پوری قوم کا قرض ہے۔
25 میٹر طویل یہ یادگار کانسی اور گرینائٹ سے تعمیر کی گئی اور 18 ستمبر 2005 کو بیٹل آف برطانیہ کی 65ویں سالگرہ کے موقع پر افتتاح کی گئی۔ افتتاحی تقریب میں اُس جنگ کے کئی زندہ بچ جانے والے پائلٹ بھی شریک ہوئے۔
اس یادگار کی سب سے اہم خصوصیت اس پر کندہ 2,937 پائلٹوں اور فضائی اہلکاروں کے نام ہیں، جو برطانیہ سمیت 14 مختلف ممالک سے تعلق رکھتے تھے اور بیٹل آف برطانیہ میں اتحادی افواج کے ساتھ شریک ہوئے تھے۔ ان میں پولینڈ، چیکوسلواکیہ، کینیڈا، آسٹریلیا، نیوزی لینڈ اور دیگر ممالک کے رضاکار بھی شامل تھے۔
دریائے ٹیمز کے کنارے واقع یہ یادگار آج لندن آنے والے سیاحوں کے لیے ایک اہم تاریخی مقام ہے۔ پارلیمنٹ ہاؤس، ویسٹ منسٹر برج اور لندن آئی کے قریب موجود یہ یادگار اس دور کی یاد تازہ کرتی ہے جب برطانیہ کی فضاؤں میں لڑی جانے والی ایک جنگ نے یورپ کی تاریخ کا رخ بدل دیا تھا۔