Tag: جرمنی

فیفا ورلڈ کپ میں دو بڑے اپ سیٹ دیکھنے میں آئے، جہاں مراکش نے نیدرلینڈز کو، جبکہ پیراگوئے نے چار مرتبہ کی عالمی چیمپئن جرمنی کو پینلٹی شوٹ آؤٹ میں شکست دے کر پری کوارٹر فائنل میں جگہ بنا لی۔

مونٹیری میں کھیلے گئے میچ میں مراکش نے نیدرلینڈز کو سنسنی خیز مقابلے کے بعد پینلٹی شوٹ آؤٹ میں 3-2 سے شکست دی۔ مقررہ وقت اور اضافی وقت کے اختتام پر دونوں ٹیموں کا اسکور 1-1 سے برابر تھا، جس کے بعد فیصلہ پینلٹی شوٹ آؤٹ پر ہوا۔

میچ کے آغاز سے ہی مراکش نے جارحانہ کھیل پیش کیا اور نیدرلینڈز کے گول پر مسلسل حملے کیے، تاہم ڈچ گول کیپر بارٹ وربروگن نے شاندار کارکردگی کا مظاہرہ کرتے ہوئے کئی یقینی گول بچا لیے، جبکہ مراکش کے چند حملے گول پوسٹ سے بھی ٹکرا گئے۔

پہلے ہاف میں دونوں ٹیمیں گول کرنے میں ناکام رہیں، لیکن دوسرے ہاف کے 72ویں منٹ میں لیورپول کے فارورڈ کوڈی خاکپو نے خوبصورت گول کرکے نیدرلینڈز کو برتری دلا دی۔ یہ گول ان کے لیے جذباتی اہمیت بھی رکھتا تھا، کیونکہ چند روز قبل انہوں نے اپنے نومولود بچے کے انتقال کی افسوسناک خبر شیئر کی تھی۔

تاہم نیدرلینڈز کی برتری زیادہ دیر برقرار نہ رہ سکی۔ اضافی وقت کے آغاز میں مراکش کے عیسیٰ دیوپ نے چیمس الدین طالبی کے شاندار کراس پر ہیڈر کے ذریعے گول کرکے مقابلہ برابر کر دیا۔

اضافی وقت میں بھی دونوں ٹیموں نے کئی مواقع بنائے، لیکن فیصلہ پینلٹی شوٹ آؤٹ پر ہوا، جہاں نیدرلینڈز کے تین کھلاڑی پینلٹیز ضائع کر بیٹھے، جبکہ اسماعیل صیباری نے فیصلہ کن پینلٹی گول کرکے مراکش کو 3-2 سے تاریخی کامیابی دلا دی۔

اس کامیابی کے بعد مراکش نے پری کوارٹر فائنل میں جگہ بنا لی، جہاں اس کا مقابلہ کینیڈا سے ہوگا۔

ادھر میساچوسٹس کے شہر فاکسبرو میں کھیلے گئے ایک اور پری کوارٹر فائنل میں پیراگوئے نے جرمنی کو پینلٹی شوٹ آؤٹ میں شکست دے کر ٹورنامنٹ کا ایک اور بڑا اپ سیٹ کر دیا۔

مقررہ وقت اور اضافی وقت کے بعد مقابلہ 1-1 سے برابر رہا۔ پیراگوئے کے گول کیپر اورلینڈو گل نے پینلٹی شوٹ آؤٹ میں کائی ہاورٹز اور نک وولٹیمیڈے کی پینلٹیز روک لیں، جبکہ جوناتھن تاہ کی پینلٹی بار کے اوپر سے گزر گئی۔ اس کے بعد خوسے کینالے نے فیصلہ کن پینلٹی گول کرکے اپنی ٹیم کو فتح دلائی۔

یہ ورلڈ کپ کی تاریخ میں پہلی مرتبہ تھا کہ جرمنی کو پینلٹی شوٹ آؤٹ میں شکست کا سامنا کرنا پڑا۔

پیراگوئے کے گول کیپر اورلینڈو گل نے میچ کے بعد کہا کہ اس کامیابی کو الفاظ میں بیان کرنا مشکل ہے۔ ان کے مطابق پوری ٹیم نے جرمنی کے مسلسل حملوں کا ڈٹ کر مقابلہ کیا، جبکہ پینلٹی شوٹ آؤٹ سے پہلے جرمن کھلاڑیوں کی تیاری کا باریک بینی سے جائزہ لیا گیا تھا۔

پیراگوئے کے کوچ گستاوو الفارو کی دفاعی حکمت عملی بھی کامیاب ثابت ہوئی۔ اگرچہ جرمنی نے میچ میں 75 فیصد گیند اپنے قبضے میں رکھی اور 21 حملے کیے، لیکن پیراگوئے کے منظم دفاع نے اسے زیادہ خطرناک مواقع پیدا نہیں کرنے دیے۔

پیراگوئے نے 42ویں منٹ میں جولیو اینسیسو کے گول سے برتری حاصل کی، جبکہ جرمنی نے دوسرے ہاف میں کائی ہاورٹز کے ذریعے مقابلہ برابر کر دیا۔ اضافی وقت میں جرمنی کا ایک گول وی اے آر کی مدد سے مسترد کر دیا گیا، جس کے بعد فیصلہ پینلٹی شوٹ آؤٹ پر ہوا۔

اس تاریخی کامیابی کے ساتھ پیراگوئے نے جرمنی کو ایونٹ سے باہر کر دیا، جبکہ جرمنی کو مسلسل تیسری مرتبہ ورلڈ کپ میں مایوس کن انداز میں ٹورنامنٹ سے جلد رخصت ہونا پڑا۔ دوسری جانب مراکش اور پیراگوئے کی فتوحات کو موجودہ ورلڈ کپ کے سب سے بڑے اپ سیٹس میں شمار کیا جا رہا ہے۔

مغربی جرمنی کے سرسبز اور پہاڑی آئیفل ریجن میں، جو سابق دارالحکومت بون کے قریب واقع ہے، نازی دور کی ایک عظیم اور خوفناک یادگار آج بھی موجود ہے۔

یہ مقام، جسے اوگڈنزبرگ ووگلزانگ کہا جاتا ہے، کبھی ایڈولف ہٹلر کے مستقبل کے ایلیٹ رہنماؤں کی تربیت کے لیے بنایا گیا تھا۔

آج یہی مقام آئیفل نیشنل پارک کے اندر ایک میوزیم، یادگار اور تعلیمی مرکز کی صورت اختیار کر چکا ہے، جہاں تاریخ کے ایک تاریک باب کو محفوظ کیا گیا ہے۔

پہاڑوں میں ہٹلر کی ایلیٹ اکیڈمی کا قیام

ووگلزانگ کمپلیکس کی تعمیر 1934 میں نازی حکومت کے ابتدائی دور میں شروع ہوئی۔ یہ ادارہ “Ordensburgen” یعنی ایلیٹ قیادت کے تربیتی مراکز میں سے ایک تھا، جن کا مقصد نازی پارٹی کے وفادار اور نظریاتی رہنماؤں کو تیار کرنا تھا۔

آئیفل کے دور افتادہ اور پہاڑی علاقے میں قائم اس وسیع و عریض پتھریلے کمپلیکس کا مقصد تھرڈ رائخ کے مستقبل کے حکمران طبقے کو تیار کرنا تھا۔

بظاہر یہ مقام کوئی حراستی یا موت کا کیمپ نہیں تھا، بلکہ نازی سیاسی اور نظریاتی رہنماؤں کی تربیت کا ایک خصوصی ادارہ تھا۔
یہاں منتخب نوجوانوں کو سخت جسمانی تربیت، فوجی نظم و ضبط، اور نازی نظریات کی تعلیم دی جاتی تھی، جس میں نسلی برتری اور ایڈولف ہٹلر سے مکمل وفاداری پر زور دیا جاتا تھا۔
مورخین کے مطابق یہ اکیڈمی ہٹلر کے اس بڑے منصوبے کا حصہ تھی، جس کا مقصد ایک نئی قیادت تیار کرنا تھا جو جرمن معاشرے پر حکمرانی کرے اور پورے یورپ میں نازی اثر و رسوخ کو فروغ دے۔

اگرچہ یہ بظاہر ایک ٹریننگ اکیڈمی تھی، مگر بعض مورخین کے مطابق اسے ایسے مراکز میں بھی شمار کیا جاتا ہے جہاں دشمن فوج کے گرفتار قیدیوں کو لایا جاتا تھا۔

کچھ رپورٹس کے مطابق یہاں مخالفین پر تشدد اور انہیں سزائیں دی جاتی تھیں، تاہم یہ قیدیوں کے لیے قائم باقاعدہ حراستی کیمپ نہیں تھا۔ یہ ایک ایسا مرکز تھا جسے تعلیم و تربیت کے نام پر چلایا جاتا رہا۔

نازی طاقت کے اظہار کے لیے عظیم الشان تعمیرات

ووگلزانگ کمپلیکس تقریباً 50 ہزار مربع میٹر پر محیط تھا، جس میں بیرکس، لیکچر ہالز، کھیلوں کی سہولیات، اور ایک 48 میٹر بلند ٹاور شامل تھا جو اردگرد کی وادی پر نظر رکھتا تھا۔
اس کی تعمیراتی طرز نازی نظریے کی عکاسی کرتی تھی، جس میں مضبوط، مستقل اور طاقت کی علامت بننے والے بڑے پتھریلے ڈھانچے شامل تھے۔

کمپلیکس میں قیادت کی تربیت کے کلاس رومز، جسمانی تربیت کے میدان، فوجی پریڈ گراؤنڈز، تربیت حاصل کرنے والوں کے رہائشی کوارٹرز اور نگرانی کے ٹاورز بھی موجود تھے۔

پورے کمپلیکس کو قرون وسطیٰ کے قلعے کی طرز پر تعمیر کیا گیا تھا تاکہ نازیوں کے نئے حکمران طبقے کے تصور کو مضبوط کیا جا سکے۔

دوسری جنگ عظیم کے بعد فوجی کنٹرول

1945 میں جرمنی کی شکست کے بعد ووگلزانگ کو اتحادی افواج نے اپنے قبضے میں لے لیا۔ ابتدا میں یہ برطانوی فوج کے کنٹرول میں رہا، بعد ازاں اسے بیلجیئم کی فوج اور نیٹو کے حوالے کر دیا گیا۔

تقریباً ساٹھ برس تک یہ علاقہ ایک محدود فوجی تربیتی زون رہا، جہاں عام شہریوں کا داخلہ ممنوع تھا۔ اس دوران اردگرد کے جنگلات میں فوجی مشقیں کی جاتی رہیں۔

قریبی دیہات خالی کرا لیے گئے، نازی علامات کو ہٹا دیا گیا یا تباہ کر دیا گیا۔
اگرچہ اتحادی افواج کی بمباری سے کچھ نقصان ہوا، لیکن کمپلیکس کا بڑا حصہ محفوظ رہا۔

نیشنل پارک اور تاریخی یادگار میں تبدیلی

2004 میں جرمن حکومت نے آئیفل نیشنل پارک قائم کیا، جو اس مقام کی تاریخ میں ایک اہم موڑ ثابت ہوا۔ 2006 میں ووگلزانگ کو عوام کے لیے کھول دیا گیا۔

یہاں جدید نمائشوں میں دکھایا جاتا ہے کہ نازی حکومت نے کس طرح اپنے نظریات کو فروغ دیا اور لوگوں کو متاثر کیا۔
جرمن حکام نے اس مقام کو جان بوجھ کر ایک تعلیمی اور یادگاری مرکز میں تبدیل کیا تاکہ آئندہ نسلوں کو انتہا پسندی کے خطرات سے آگاہ کیا جا سکے۔

جو مقام کبھی نازی قیادت کی خفیہ تربیت کے لیے استعمال ہوتا تھا، وہ آج امن، برداشت اور تاریخی شعور کی علامت بن چکا ہے۔

 

دوسری جنگِ عظیم کے بعد جرمنی کی شکست نے صرف ایک ملک کو نہیں بدلا، بلکہ پوری دنیا کے نقشے اور سیاست کی سمت تبدیل کردی۔ جنگ کے بعد دو طاقتیں سامنے آئیں۔ ایک طرف امریکہ کی سربراہی میں مغربی ممالک تھے، دوسری طرف سوویت یونین۔ دونوں کے نظریے الگ تھے، دونوں کی سوچ مختلف تھی۔ یہی نظریاتی لڑائی سرد جنگ کہلائی۔ اس سرد جنگ نے یورپ کے دل یعنی جرمنی کو دو حصوں میں بانٹ دیا۔

اسی تقسیم کی سب سے بڑی، سب سے سخت اور سب سے تکلیف دہ علامت تھی برلن وال۔

جنگ کے بعد جرمنی کے دو حصے ہوگئے۔ مغربی جرمنی کو امریکا اور یورپ کا تعاون حاصل تھا۔ یہاں جمہوریت تھی، کھلی معیشت تھی، روزگار کے مواقع بڑھ رہے تھے اور لوگوں کو بہتر زندگی مل رہی تھی۔

دوسری طرف مشرقی جرمنی تھا جو کمیونسٹ سوویت یونین کے زیر اثر تھا۔ یہاں ریاست سخت تھی، نگرانی زیادہ تھی، اظہارِ رائے محدود۔ اور شہری اپنی مرضی سے زندگی نہیں گزار سکتے تھے۔

برلن شہر سوویت حصے میں تھا، مگر اس کی اہمیت سب سے زیادہ تھی۔ ایک طرف آزادی کی تلاش تھی، دوسری طرف ریاستی گرفت۔ نقشے پر ایک ہی شہر، لیکن حقیقت میں دو دنیائیں۔ دونوں کے درمیان سوچ بھی الگ تھی، طرزِ زندگی بھی الگ اور خواب بھی الگ۔

1949 سے 1961 تک تقریباً 30 لاکھ سے زائد شہری مشرقی جرمنی سے بھاگ کر مغربی علاقے میں پہنچے۔ وہ صرف بہتر روزگار یا اچھی زندگی نہیں چاہتے تھے۔ وہ آزاد بھی ہونا چاہتے تھے۔ وہ اپنے بچوں کے لیے کھلی ہوا، کھلی سوچ اور محفوظ مستقبل چاہتے تھے۔ یہی فرار مشرقی جرمنی کے حکمرانوں کے لیے سب سے بڑا خطرہ بن گیا۔

پھر وہ رات آئی جس نے تاریخ کا رخ بدل دیا۔ تیرہ اگست 1961 کی صبح برلن کے لوگ جاگے تو شہر کے درمیان خاردار تاریں تھیں، کنکریٹ کے بلاکس تھے، سڑکوں پر مسلح سپاہی کھڑے تھے۔ ایک رات میں راستے بند ہوگئے۔ ایک رات میں خاندان بچھڑ گئے۔ ایک رات میں شہر دو ٹکڑوں میں بٹ گیا۔ لوگ اپنے ہی گھروں، رشتوں اور گلیوں سے قید ہوگئے۔ یہ دیوار صرف اینٹوں کا ڈھیر نہیں تھی۔ یہ خوف کی علامت تھی۔ یہ جبر کی علامت تھی۔ یہ انسانی خواہش کے خلاف ایک دیوار تھی۔

اگلے اٹھائیس سال تک دنیا نے دو مختلف منظر دیکھے۔ ایک طرف مشرقی حصے میں سخت نگرانی تھی، خفیہ پولیس تھی، ہر شخص پر شک تھا، بولنے کی آزادی نہیں تھی اور ریاستی جبر ہر جگہ تھا۔ دوسری طرف مغربی جرمنی میں خوشحالی تھی، سوچنے اور بولنے کی آزادی تھی، کاروبار اور روزگار بڑھ رہا تھا۔ دونوں دنیائیں ایک دیوار کے آرپار دکھتی تھیں، لیکن ان کی زندگیوں میں زمین آسمان کا فرق تھا۔

ہزاروں لوگوں نے دیوار عبور کرنے کی کوشش کی۔ کئی نے سرنگیں بنائیں، کئی نے دیوار پر چڑھ کر چھلانگ لگائی، کچھ نے گاڑیوں میں چھپ کر نکلنے کی کوشش کی۔ درجنوں لوگ مارے گئے۔ لیکن دیوار آزادی کی خواہش کو نہ روک سکی۔ یہ خواہش ہر دن مضبوط ہوتی گئی۔

1980 کی دہائی کے آخر میں حالات پھر بدلنے لگے۔ سرد جنگ کمزور پڑ رہی تھی۔ سوویت طاقت کمزور ہو رہی تھی۔ مشرقی یورپ میں تبدیلی کی لہر اٹھ چکی تھی۔ مشرقی جرمنی کے شہروں میں لاکھوں لوگ سڑکوں پر نکل آئے۔ انہوں نے نعرہ لگایا: ’ہم ہیں عوام‘۔ یہ نعرہ برسوں کے خوف کو توڑ گیا۔ لوگ کھلے عام آزادی مانگنے لگے۔ ریاست انہیں روک نہ سکی۔

پھر آیا نو نومبر 1989۔ وہ رات جسے دنیا کبھی نہیں بھولے گی۔ برلن وال کے دروازے کھل گئے۔ دونوں طرف کے لوگ دوڑ کر دیوار تک پہنچے۔ نعرے لگے، تالیاں بجیں، لوگ دیوار پر چڑھ گئے۔ کسی نے خوشی سے قہقہہ لگایا، کوئی شدت جذبات سے رو پڑا۔ کچھ لوگوں نے ہتھوڑوں سے اینٹیں توڑیں۔ یہ وہ لمحہ تھا جب پوری قوم نے آزادی کی سانس لی۔ یہ وہ رات تھی جب دنیا کی سب سے سخت دیوار لوگوں کے قدموں میں گِر گئی۔

ایک سال بعد تین اکتوبر 1990 کو جرمنی سرکاری طور پر دوبارہ ایک ملک بن گیا۔ اسے آج ’جرمن اتحاد کا دن‘ کہا جاتا ہے۔ یہ دن صرف ایک ملک کے ملنے کی کہانی نہیں، یہ انسانی ہمت، اتحاد اور آزادی کی جیت کی علامت ہے۔ یہ یاد دلاتا ہے کہ دنیا کی سب سے مضبوط دیوار بھی اس وقت گِر جاتی ہے جب عوام اپنی آزادی کے لیے کھڑے ہوجائیں۔

جرمنی کی ریاست باڈن ووٴرٹمبرگ میں واقع ہائیڈل برگ قلعہ، جسے جرمن زبان میں شلوس ہائیڈل برگ یا ہائیڈل برگر شلوس کہا جاتا ہے، یورپ کے قدیم اور تاریخی قلعوں میں شمار ہوتا ہے۔ یہ قلعہ دریائے نیکر کے کنارے ایک پہاڑی پر واقع ہے اور صدیوں سے جرمن تاریخ، سیاست اور ثقافت کا خاموش گواہ رہا ہے۔

ہائیڈل برگ قلعے کی ابتدائی تعمیر تیرہویں صدی میں شروع ہوئی، جب یہ علاقہ ہولی رومن ایمپائر کے زیرِ اثر تھا۔ ابتدا میں یہ قلعہ مقامی حکمرانوں کی رہائش اور دفاعی مرکز کے طور پر استعمال ہوتا تھا۔ وقت کے ساتھ ساتھ مختلف ادوار میں اس میں توسیع اور تعمیر نو ہوتی رہی، جس کے باعث قلعے میں گوتھک اور نشاۃ ثانیہ طرزِ تعمیر کی جھلک واضح طور پر دیکھی جا سکتی ہے۔

پندرھویں اور سولہویں صدی میں ہائیڈل برگ قلعہ پیلاٹینیٹ کے حکمرانوں کی مرکزی رہائش گاہ بنا۔ اسی دور میں قلعے کو سیاسی اور انتظامی اہمیت حاصل ہوئی۔ یہاں شاہی تقریبات، سفارتی ملاقاتیں اور حکومتی فیصلے کیے جاتے تھے۔ قلعے کے اندر تعمیر کیا گیا عظیم الشان ہال، رہائشی کمرے اور مذہبی عبادت گاہیں اس دور کی شاہانہ زندگی کی عکاسی کرتی ہیں۔

سترھویں صدی میں یورپ میں ہونے والی جنگوں، بالخصوص تیس سالہ جنگ اور بعد ازاں فرانس اور جرمنی کے درمیان تنازعات کے دوران ہائیڈل برگ قلعے کو شدید نقصان پہنچا۔ کئی بار قلعہ تباہ ہوا اور دوبارہ تعمیر نہ کیا جا سکا، جس کے باعث یہ رفتہ رفتہ ایک تاریخی کھنڈر کی صورت اختیار کر گیا۔ اٹھارویں صدی میں بجلی گرنے سے بھی قلعے کے کچھ حصے منہدم ہو گئے۔

انیسویں صدی میں جرمنی میں تاریخی ورثے کے تحفظ کا شعور بڑھا تو ہائیڈل برگ قلعے کو محفوظ کرنے کے اقدامات کیے گئے۔ مکمل بحالی کے بجائے اسے اسی تاریخی حالت میں محفوظ رکھا گیا تاکہ آنے والی نسلیں اس کی اصل ساخت اور تاریخ کو سمجھ سکیں۔

آج قلعے کے کئی حصے میوزیم میں تبدیل ہو چکے ہیں، جہاں پرانی اشیا، دستاویزات اور فنِ تعمیر کی مثالیں رکھی گئی ہیں۔

ہائیڈل برگ قلعہ آج جرمنی کے نمایاں سیاحتی مقامات میں شامل ہے۔ ہر سال دنیا بھر سے لاکھوں سیاح اس قلعے کو دیکھنے آتے ہیں۔ یہ قلعہ نہ صرف جرمن تاریخ کی نمائندگی کرتا ہے بلکہ یورپ کی سیاسی، عسکری اور ثقافتی تبدیلیوں کی ایک جامع تصویر بھی پیش کرتا ہے۔۔

جرمنی کے شہر ہائیڈلبرگ میں شاعر مشرق اور پاکستان کے قومی شاعر علامہ اقبال کا تاریخی گھر واقع ہے، جہاں انہوں نے اپنی علمی اور فکری زندگی کے اہم سال گزارے، جو آج بھی سیاحوں کی توجہ کا مرکز بنا ہوا ہے۔

ہائیڈلبرگ کا یہ گھر ایک سادہ سا مکان ہے لیکن اس کی اہمیت عالمی سطح پر بہت زیادہ ہے کیونکہ یہاں اقبال نے فلسفے اور ادب پر گہرائی سے مطالعہ کیا
یہ وہ زمانہ تھا جب اقبال نے جرمن زبان سیکھی اور مغربی فلسفے کو سمجھنے کی کوشش کی تاکہ اپنے تحقیقی مقالے اور نظریات کو مضبوط بنا سکیں
گھر کے اردگرد کا ماحول اور نییکر دریا کے کنارے کی خوبصورتی نے اقبال کی تخلیقی اور فکری سوچ پر گہرا اثر ڈالا

یہاں انہوں نے مشرق اور مغرب کے فلسفوں کو اپنے ذہن میں جوڑا اور بعد میں ان کا اثر ان کی شاعری اور نظریات میں دیکھا جا سکتا ہے
ہائیڈلبرگ میں گزارا ہوا وقت اقبال کے لیے ایک علمی سفر کی علامت تھا جس نے ان کی شخصیت اور فکر کو نکھارا

یہ مکان آج بھی اُن کے مطالعے اور تخلیق کے لمحات کی یاد دلاتا ہے اور طلبہ اور دانشوروں کے لیے ایک تحریک کا ذریعہ ہے
اس دوران اقبال نے فلسفہ اور ادب کے مختلف پہلوؤں پر کام کیا اور اپنی شاعری میں جدید خیالات کو شامل کیا
ہائیڈلبرگ میں اقبال کی موجودگی نے پاکستان کے بانی شاعر کی حیثیت سے ان کی شناخت کو مزید مضبوط کیا

یہ گھر نہ صرف تاریخی اہمیت رکھتا ہے بلکہ علمی اور ثقافتی ورثے کا حصہ بھی ہے جو آنے والی نسلوں کے لیے رہنمائی فراہم کرتا ہے
یہ مکان ہمیں یہ سکھاتا ہے کہ علم اور تخلیق کی تلاش انسان کو دنیا کے مختلف ثقافتوں اور فلسفوں سے جوڑ سکتی ہے

آج یہ گھر نہ صرف پاکستانیوں بلکہ دنیا بھر کے دانشوروں کے لیے ایک علامتی مقام ہے جو اقبال کے فکری سفر کا ثبوت دیتا ہے
ہائیڈلبرگ میں علامہ اقبال کا یہ گھر ہمیں یاد دلاتا ہے کہ عظیم شاعر اور فلسفی کی تخلیقی زندگی میں ہر جگہ علم کی روشنی بکھر سکتی ہے۔