سندھ کے سرکاری اسکولوں میں قائم بُک بئنک کے نظام سے متعلق نئے انتظامی احکامات جاری کر دیے گئے ہیں۔ محکمہ اسکول ایجوکیشن کے مطابق سالانہ امتحانات کے بعد طلبہ کو مفت فراہم کی گئی درسی کتب لازمی طور پر واپس لی جائیں گی تاکہ انہیں آئندہ تعلیمی سال میں دوبارہ استعمال کیا جا سکے۔
وزیر تعلیم سندھ سید سردار علی شاہ کی ہدایت پر جاری احکامات میں کہا گیا ہے کہ ہر طالب علم کے رزلٹ کارڈ پر درسی کتب کی واپسی کا اندراج کیا جائے گا۔ اسکول انتظامیہ جاری کی گئی اور واپس وصول ہونے والی کتابوں کا باقاعدہ ریکارڈ رکھے گی اور تمام جمع شدہ کتابیں بُک بئنک میں محفوظ کی جائیں گی۔
محکمہ نے پرائمری سے ہائیر سیکنڈری سطح تک تمام طلبہ سے کتابوں کی واپسی یقینی بنانے کی ہدایت کی ہے۔ حکام کے مطابق یہ اقدام وسائل کے مؤثر استعمال اور سرکاری اخراجات میں کمی کے لیے کیا جا رہا ہے تاکہ ہر سال بڑی تعداد میں درسی کتابیں دوبارہ قابلِ استعمال رہیں۔
نگرانی کے نظام کے تحت ضلعی تعلیمی افسران کو اپنے اضلاع میں موجود بُک بئنک اسٹاک کی تفصیلات جمع کرانے کی ہدایت دی گئی ہے۔ ضلعی سطح کا ریکارڈ ریجنل ڈائریکٹرز کو ارسال کیا جائے گا، جبکہ ریجنل ڈائریکٹرز مجموعی ضلع وار ڈیٹا محکمہ اسکول ایجوکیشن کو فراہم کرنے کے پابند ہوں گے۔
حکام کا کہنا ہے کہ بُک بئنک کا مؤثر نفاذ نہ صرف درسی مواد کی دستیابی کو بہتر بنائے گا بلکہ سرکاری وسائل کے بہتر انتظام کو بھی یقینی بنائے گا، تاکہ زیادہ سے زیادہ طلبہ تک بروقت کتابیں پہنچائی جا سکیں۔