بالی ووڈ کی کوئی مووی نہیں، یہ حقیقی دنیا ہے اور یہ ہے نیپال۔ یہاں وی آئی پی کلچر کے خاتمے کا اعلان کر دیا گیا ہے۔ اب پولیس کسی وزیر کی گاڑی کو بھی روک کر تلاشی لے سکتی ہے۔ اسکولوں کی فیسیں کم کر دی گئی ہیں۔ کرپٹ مافیا پر ہاتھ ڈالنے کا اعلان کیا گیا ہے۔ وزیر اعظم اور تمام وزرا کا پروٹوکول ختم ہو چکا ہے۔
یہ سب کچھ ایک ریپر نے کر دکھایا ہے۔ جین زی انقلاب کے بعد نیپال میں ایک ریپر نے الیکشن جیت کر جین زی حکومت قائم کی۔ بالین شاھ، جو ایک مشہور ریپر ہیں، نے 2022 میں سیاست میں قدم رکھا اور کھٹمنڈو کے مئیر منتخب ہوئے۔ 2025 میں ملک بھر میں کرپشن کے خلاف احتجاجی تحریک میں ان کی قیادت نمایاں رہی۔ چار سال کے اندر ایک شہر کے مئیر سے وزیر اعظم بننے کا یہ سفر کسی فلمی کہانی سے کم نہیں۔
ریپر بالین شاہ کی حکومت نے 100 دن کا ایکشن پلان جاری کیا ہے، جس سے نیپال کا نقشہ ہی بدلتا ہوا نظر آ رہا ہے۔ اب کسی بھی سرکاری شخصیت کو بزنس کلاس میں سفر کرنے کی اجازت نہیں ہے۔ وزیر اعظم کا واضح حکم ہے کہ ان کی تصویر کسی سرکاری دفتر میں نہیں لگائی جائے گی۔
یہ صرف شروعات ہے۔ 1990 سے لے کر آج تک جتنے بھی وزرا رہے ہیں، سب کو اپنے اثاثے ڈیکلیئر کرنے ہوں گے۔ پاسپورٹ، لائسنس، شناختی کارڈ – سب کچھ 100 فیصد ڈیجیٹل کر دیا گیا ہے۔ نجی اسپتالوں کو حکم دیا گیا ہے کہ وہ اپنے 10 فیصد بستر غریب مریضوں کے لیے مختص کریں۔
یہ سب کچھ 100 دن کے ایکشن پلان کا حصہ ہے، جسے آن لائن بھی جاری کر دیا گیا ہے تاکہ ہر شہری خود دیکھ سکے کہ کیا کام ہو چکا ہے اور کیا باقی ہے۔ یہ کہانی ابھی ختم نہیں ہوئی۔