وزیراعلیٰ خیبرپختونخوا محمد سہیل آفریدی شہید بےنظیر بھٹو ویمنز یونیورسٹی کی وائس چانسلر کی انگریزی میں تقریر پر ناخوش ہو گئے اور آئندہ اردو میں تقریر کرنے کی ہدایت جاری کر دی۔
پشاور میں شہید بےنظیر بھٹو ویمنز یونیورسٹی کے کانووکیشن سے خطاب کرتے ہوئے وزیراعلیٰ خیبرپختونخوا نے کہا کہ وائس چانسلر صاحبہ نے انگریزی میں تقریر کی جو انہیں پسند نہیں آئی۔
انہوں نے کہا کہ پاکستان کی قومی زبان اردو ہے اور تقریبات میں اردو کو ترجیح دی جانی چاہیے۔ وزیراعلیٰ نے کہا کہ اگلی بار اگر انگریزی میں تقریر ہوئی تو انہیں غصہ آئے گا۔
وزیراعلیٰ خیبرپختونخوا محمد سہیل آفریدی کا کہنا تھا کہ وہ اس سے قبل بھی تمام سرکاری یونیورسٹیوں کو ہدایت دے چکے ہیں کہ سرکاری تقاریب میں اردو میں خطاب کیا جائے۔