وفاقی حکومت نے پاکستان میں مصنوعی ذہانت یا اے آئی کے فروغ کے لیے ‘انڈس اے آئی ویک ‘2026 کے انعقاد کا اعلان کر دیا ہے۔ ہفتہ بھر جاری رہنے والا یہ قومی پروگرام نو سے 15 فروری 2026 تک ملک کے مختلف حصوں میں منعقد ہوگا، جبکہ مرکزی سرگرمیاں اسلام آباد میں ہوں گی۔
اس حوالے سے وفاقی وزیر برائے انفارمیشن ٹیکنالوجی و ٹیلی کمیونیکیشن شیزا فاطمہ خواجہ نے اعلان کیا کہ اس قومی اقدام کا مقصد پاکستان میں مصنوعی ذہانت کے استعمال، فہم اور عملی اطلاق کو فروغ دینا ہے تاکہ جدید ٹیکنالوجی کو قومی ترقی سے جوڑا جا سکے۔
انڈس اے آئی ویک میں پالیسی ساز، ٹیکنالوجی ماہرین، نجی کمپنیاں، جامعات، اسٹارٹ اپس، طلبہ اور عام شہری شرکت کر سکیں گے۔ یہ پروگرام پبلک پرائیویٹ پارٹنرشپ کے تحت وزارت آئی ٹی و ٹیلی کمیونیکیشن کی نگرانی میں منعقد ہوگا، جسے ایک جامع قومی پلیٹ فارم قرار دیا جا رہا ہے۔
پروگرام میں قومی سطح پر ٹیکنالوجی کی نمائش شامل ہوگی، جہاں نئی اور جدید ایجادات پیش کی جائیں گی۔ اختراعات اور اسٹارٹ اپس کو نمایاں کیا جائے گا تاکہ بانیوں کو سرمایہ کاروں سے رابطے کا موقع مل سکے۔ طلبہ اور پیشہ ور افراد کے لیے مہارتوں کی تربیت اور سرٹیفکیشن کے مواقع بھی فراہم کیے جائیں گے۔
انڈس اے آئی ویک میں گیمنگ اور عملی تجربات پر مبنی مصنوعی ذہانت کا خصوصی حصہ بھی شامل ہوگا۔ عوام کے لیے انٹرایکٹو سرگرمیوں کا اہتمام کیا جائے گا تاکہ مصنوعی ذہانت کو آسان انداز میں سمجھایا جا سکے اور اس تک رسائی بڑھائی جا سکے۔
پروگرام کا باضابطہ آغاز نو فروری کو اسلام آباد کے جناح کنونشن سینٹر میں انڈس اے آئی سمٹ سے ہوگا۔ سمٹ میں ملکی اور غیر ملکی ماہرین مصنوعی ذہانت کے مستقبل، پالیسی اور معاشی مواقع پر گفتگو کریں گے۔ نو اور 10 فروری کو اسلام آباد اسپورٹس کمپلیکس میں انوویشن، لرننگ اور انگیجمنٹ ایرینا منعقد ہوگا، جہاں نوجوانوں اور پروفیشنلز کو جدید اے آئی ٹیکنالوجی دیکھنے اور سیکھنے کا موقع ملے گا۔
حکام کے مطابق اس قومی ہفتے کا مقصد مصنوعی ذہانت کو عام لوگوں کے لیے قابل فہم بنانا، نوجوانوں کو جدید مہارتوں سے آراستہ کرنا اور تحقیق و صنعت کے درمیان تعاون کو مضبوط بنانا ہے تاکہ پاکستان ڈیجیٹل معیشت میں مؤثر کردار ادا کر سکے۔
وفاقی وزیر کے مطابق انڈس اے آئی ویک گذشتہ برس متعارف کرائی گئی قومی اے آئی پالیسی کا عملی تسلسل ہے۔ اس پالیسی کا ہدف پاکستان میں ذمہ دار، محفوظ اور سب کے لیے قابل رسائی مصنوعی ذہانت کو فروغ دینا ہے۔ ان کے مطابق یہ پروگرام محض گفتگو تک محدود نہیں رہے گا بلکہ عملی اقدامات، تربیت اور شراکت داری کی راہ ہموار کرے گا۔
حکومتی حلقوں کا کہنا ہے کہ انڈس اے آئی ویک 2026 پاکستان کی جانب سے یہ واضح پیغام ہے کہ ملک جدید ٹیکنالوجی کو قومی ترقی، روزگار کے مواقع اور عالمی تعاون کے لیے ایک مضبوط بنیاد بنانا چاہتا ہے۔