کراچی کے مصروف شہری ماحول میں کڈنی ہِل پارک ایک ایسا سبز مقام ہے جہاں قدرتی بلندی، درختوں اور کھلے ماحول کو شہری تفریح سے جوڑنے کی کوشش کی گئی ہے۔
اسی پارک کے اندر فوزیہ وہاب گارڈن قائم کیا گیا ہے، جہاں پہنچنے کے لیے شہری مرکزی دروازے سے طویل راستہ طے کرکے کڈنی ہِل کی بلندی پر پہنچتے ہیں۔ مرکزی پہاڑی کے قریب واقع یہ سرسبز باغ شہریوں کو کچھ دیر سستانے اور قدرتی ماحول سے لطف اندوز ہونے کا موقع فراہم کرتا ہے۔
یہاں آنے والی فیملیز درختوں کے سائے میں بیٹھتی ہیں، تفریح کرتی ہیں اور بعض خاندان اپنے ساتھ لایا ہوا گھر کا کھانا بھی کھاتے ہیں، جس سے یہ جگہ خاندانی تفریح کے لیے ایک پُرسکون مقام بن گئی ہے۔
فوزیہ وہاب گارڈن پاکستان پیپلز پارٹی کی رہنما فوزیہ وہاب کے نام سے منسوب ہے۔ کراچی میٹروپولیٹن کارپوریشن کے مطابق باغ میں دو سو سے زائد پھل دار درخت لگائے گئے تھے۔
یہ باغ کڈنی ہِل پارک کے وسیع سبز ماحول کا ایک حصہ ہے۔ پورے پارک میں شہریوں کے لیے پیدل چلنے کے راستے اور مختلف مقامات تک رسائی فراہم کی گئی ہے۔
کڈنی ہِل پارک کی نمایاں خصوصیات میں اس کی قدرتی بلندی بھی شامل ہے۔ کے ایم سی کے مطابق یہاں ایک مقام سطح زمین سے تقریباً 219 فٹ بلند ہے، جہاں سے کراچی کے مختلف علاقوں کا دور تک منظر دیکھا جا سکتا ہے۔
پارک میں درختوں اور پودوں کی آبپاشی کے لیے پانی ذخیرہ کرنے کا ٹینک بھی بنایا گیا، جبکہ کے ایم سی کے مطابق پودوں کو پانی دینے کے لیے سیوریج کے پانی کو ٹریٹ کرنے کا انتظام بھی کیا گیا تھا۔
پارک میں روشنی کے لیے چار جدید لائٹ ٹاورز بھی نصب کیے گئے تھے۔ ہر ٹاور پر 24 لائٹس کے حساب سے ابتدائی طور پر مجموعی طور پر 96 لائٹس لگائی گئی تھیں۔
یوں فوزیہ وہاب گارڈن کڈنی ہِل پارک کے اندر شہری شجرکاری اور تفریح کا ایک مخصوص حصہ ہے، جبکہ پورا کڈنی ہِل پارک ایک وسیع شہری سبز اور تفریحی منصوبہ ہے، جو کراچی کے گنجان شہری ماحول میں قدرتی کھلی جگہ فراہم کرتا ہے۔